پارسى شىعاناعىنداعى اقش اسكەري كۇشتەرى. فوتو; VOA.

امەريكا قۇراما شتاتتارى ورتا شىعىستاعى اسكەرلەرىنىڭ سانىن كوبەيتۋى مۇمكىن. بۇل تۋرالى پەنتاگوننىڭ ورتا شىعىس جوسپارلارى تۋرالى اق ۇيگە بەرگەن ەسەبىندە بەلگىلى بولدى. اسكەري قولباسشىلىق باس شتابىنىڭ اسكەر سانىن كوبەيتۋ تۋرالى ءوتىنىشى كەشە اق ۇيگە تاپسىرعان. بۇنداي حاباردى امەريكالىق VOA اقپارات اگەنتتىگى اتى-ءجونىن جاسىرعان اق ءۇي لاۋازىمدىلارىنىڭ مالىمەتىنە سىلتەمە جاساي وتىرىپ تاراتقان. 

بەسبۇرىشتى سارايدىڭ (پەنتاگون) اق ۇيگە جاساعان وتىنىشىندە اسكەر سانىن كوبەيتۋمەن قاتار، "پاتريوت" زىمىراندارى مەن اسكەري كەمەلەردىڭ سانىن كوبەيتۋ تۋرالى دا تالاپتار بار. قازىرگە اق ءۇيدىڭ بۇل وتىنىشتەرگە قانداي جاۋاپ بەرگەنى بەلگىسىز. الايدا، اقش پەن يران اراسىنداعى قايشىلىقتىڭ ارتۋىنا بايلانىستى ترامپ اكىمشىلىگى ورتا شىعىستاعى اسكەري كۇشتەرىن ارتتىرۋى بەك مۇمكىن.

پەنتاگون ءوزىنىڭ داستۇرىنە ساي اسكەري مالىمەتتەر تۋرالى باق-قا مالىمدەمە بەرۋدەن باس تارتقان.

اقش پرەزيدەنتى دونالد ترامپ يراننىڭ مۇناي ەكسپورتىن "نولگە" تەڭەستىرۋ شەشىمى جانە ورتا شىعىستاعى اسكەري كۇشتەرىن يران قاتەرىنە قارسى كۇرەسۋگە جۇمىلدىرۋى ەكە ەلدىڭ شيەلەنىسىن جوعارى شەككە جەتكىزدى. ءتىپتى، قازىر ەكى ەل اراسىندا سوعىس قاۋپى جاقىن دەۋگە بولادى. سوعان قاراماستان، وتكەن اپتادا ترامپ قورعانىس ءمينيسترىنىڭ مىندەتىن وتەۋشى شاناحانعا كەزدەسكەن كەزدە يرانمەن سوعىستى قالامايتىنىن ايتقان.

“The Qazaq Times”