ترامپ ميگراتسيا جانە كوشى-قون تالاپتارىن كۇشەيتپەك

اقش پرەزيدەنتى دونالد ترامپ ميگراتسيا جانە كوشى-قون زاڭناماسىنداعى تالاپتاردى كۇشەيتۋ تۋرالى قۇجاتتى ۇسىندى.

CNN حابارلاۋىنشا، قۇجاتقا سايكەس شەتەل ازاماتتارىنا گرين كارتا بەرۋ ەرەجەسى وزگەرتىلەدى. ترامپتىڭ ۇسىنىسى بويىنشا اقش-تىڭ تۇراقتى تۇرعىنى بولۋ ءۇشىن ءبىرىنشى كەزەكتە ءبىلىمدى ءارى بىلىكتى ماماندارعا مۇمكىندىك بەرۋ كەرەك. سونىمەن قاتار اق ءۇي باسشىسى اقش ازاماتتىعىن العان ميگرانتتاردىڭ تۋعاندارىنا گرين كارتا بەرۋدى توقتاتۋ كەرەك دەيدى.

كونگرەستە مالىمدەمە جاساعان ترامپ: «بۇگىن اقش-تىڭ كوشى-قون ساياساتىن العا جىلجىتاتىن ناقتى قادام ۇسىنامىز. ەڭ الدىمەن بۇل باستاما امەريكالىقتاردىڭ قاۋىپسىزدىگى ءۇشىن جاسالىپ وتىرعانىن ايتا كەتەيىك. ەلگە ساۋاتتى، ءبىلىمدى، جىگەرلى جاستار كەلسە ەل ەكونوميكاسىنىڭ ارتۋىنا ۇلەسىن قوسادى، قىلمىس دەڭگەيى ازايادى. جاڭا زاڭ تۇراقتى مەكەن ىزدەگەندەرگە قولايلى بولادى»، – دەدى. جاڭا قۇجاتتى كونگرەس ماقۇلداماعان جاعدايدا، سايلاۋدان كەيىن قايتا ۇسىنىلماق.

2018 جىلى اقش-قا زاڭدى جولمەن كەلگەن يمميگرانتتاردىڭ جىلدىق جالاقىسى 43 مىڭ دوللار كولەمىندە ياعني ءبىر شەتەلدىك ازاماتتىڭ اي سايىنعى تابىسى 3,5 مىڭ دوللار بولعان. اق ءۇي باسشىسىنىڭ جوسپارىنا ساي ەلگە بىلىكتى ماماندار عانا تارتىلسا، ايلىق تابىسى ءۇش ەسە كوبەيىپ، 126 مىڭ دوللارعا جەتەدى. دەگەنمەن، ترامپتىڭ بۇل ۇسىنىسىنا كونگرە مۇشەلەرى قارسىلىق بىلدىرگەن. دەموكراتتاردىڭ ايتۋىنشا، ميگرانتتاردىڭ باسىم بولىگى مۇقتاجدىقتان تۇرعىلىقتى مەكەن ىزدەيدى. ولاردىڭ ەمتيحان تاپسىرۋىنا مۇمكىندىگى بولماعاندىقتان، جالدامالى قىزمەتكە تۇرادى. وسىعان بايلانىستى كونگرەس مۇشەسى يلحان ومار: «ءدال قازىرگى تاڭدا باسپانا ىزدەگەن ميگرانتتارعا بۇلاي قارسى شىعا المايمىز. دونالد ترامپتىڭ جاڭا جوسپارى قاتىگەزدىككە تولى. ءتۇرلى قيىن جاعدايدان قاشقان ادامدار عانا باسقا ەلدەن مەكەن ىزدەپ، جاڭا ءومىر باستاسام دەيدى. ءبىر عانا جۇيەمەن ازاماتتىق كۇتىپ وتىرعان 11 ميلليون ميگرانتتىڭ ۇمىتىنە نۇكتە قويۋعا بولمايدى. ترامپ وتباسىلىق قۇندىلىق دەگەن ءسوزدىڭ ماعىناسىنا پىسقىرىپ تا وتىرعان جوق»، – دەيدى.

"The Qazaq Times"