فوتو: https://www.all.net.ua

بەلارۋس پرەزيدەنتى الەكساندر لۋكاشكەنكو رەسەي مۇنايىنىڭ ساپاسىز ەكەندىگىن ايتىپ، ماسكەۋدەن وتەماقى تالاپ ەتتى.

Belta.BY حابارلاۋىنشا، لۋكاشەنكو جەرگىلىكتى اقپارات قۇرالدارىنا سۇحبات بەرىپ: «رەسەيلىك مۇناي قۇبىر جەلىسىنەن وتە كوپ كولەمدە شىعىن كەلدى. مۇناي قۇبىرىنداعى جابدىقتاردىڭ وزىنە جانە مۇناي وڭدەۋ زاۋىتىنا كەلگەن شىعىن وراسان. ءبىز كىرىستىڭ بەلگىلى ءبىر بولىگىن الا المادىق، ۆاليۋتالىق ءتۇسىم، كوپ اقشادان ايرىلدىق. ءبىزدىڭ ەلگە كەلگەن زالال كولەمى جۇزدەگەن ميلليون دوللار. ۇلكەن سوما. ماسكەۋدەن وتەماقى تالاپ ەتەمىز جانە رەسەي بۇل شەشمىمەن داۋلاسپايدى دەگەن سەنىمدەمىن»،– دەپ مالىمدەدى.

رەسمي مينسك تاراپىنان رەسەي مەن قازاقستاننان كەلەتىن مۇنايدى بەلارۋس ارقىلى پولشا، گەرمانيا جانە سلوۆاكياعا جەتكىزەتىن «درۋجبا» قۇبىر جەلىسىنە قاتىستى بىرنەشە شاعىم تۇسكەن. 12 ساۋىردە بەلارۋس ۆيتسە-پرەمەرى يگور پەتريشەنكو پرەزيدەنت الەكساندر لۋكاشەنكوعا بەلارۋس اۋماعى ارقىلى وتەتىن رەسەيدىڭ «درۋجبا» مۇناي قۇبىرىنا شەكتەۋ قويۋدى ۇسىنعان بولاتىن. پەتريشەنكونىڭ سوزىنشە، مۇناي قۇبىرى وسىدان جارتى جىل بۇرىن جوندەۋ جۇمىستارىنان ءوتۋى ءتيىس بولعان. بىراق ول ۋاقىتتا ارىپتەستىك جونىندەگى كەلىسىمگە سايكەس ول كەيىنگە قالدىرىلعان. قازىرگى تاڭدا ەكولوگيالىق ماسەلەلەرگە بايلانىستى قۇبىرعا شەكتەۋ قويۋ قاجەت نەمەسە مۇناي تاسىمالىن توقتاتۋ كەرەك.

جاقىندا بەلارۋس «بەلنەفتەحيم» كونتسەرنىنىڭ وكىلى مارينا كوستيۋچەنكو رەسەيلىك Urals ەكسپورتتىق قوسپاسىنىڭ ساپاسى سىن كوتەرمەيتىندىگىن ايتىپ، شاعىمدانعان بولاتىن. اسىرەسە، «گومەلترانسنەفت درۋجبا» ماگيسترالدى مۇناي قۇبىرى ۋچاسكەسىنە ترانزيتپەن كەلىپ تۇسەتىن مۇنايدىڭ ناشارلاۋى بەلارۋس ۇكىمەتىنە قارجىلىق قيىندىقتار تۋعىزعان. مالىمەتتەر بويىنشا، قوسپانىڭ قۇرامىندا ول مۇناي وڭدەۋ زاۋىتتارى جۇمىسىنىڭ تەحنولوگيالىق رەجيمىن بۇزاتىن حلورلى ورگانيكالىق قوسىلىستار بار. مۇناي ۇلگىلەرى «گومەلترانسنەفت درۋجبا» ااق زەرتحاناسىمەن بەلورۋسسياداعى رەسەيلىك كومپانيا وكىلىنىڭ قاتىسۋىمەن زەرتتەلگەن. وسىعان بايلانىستى بەلورۋسسيا «ترانسنەفت» اق وكىلدەرىنە شاعىم ءتۇسىرىپ، رەسەي مۇنايىن پايدالانىپ وتىرعان وزگە دە مەملەكەتتەرگە ەسكەرتۋ جاساعان.

ايتا كەتەيىك، بەلارۋس رەسەيدەن مۇناي ونىمدەرىن ساتىپ الىپ، ەكسپورتتاپ كەلگەن. بيىل رەسەي وزىنە قاۋىپ بولعان ەكونوميكالىق داعدارىستى ەڭسەرۋ ءۇشىن، مۇناي باعاسىن ءوسىرۋ تۋرالى شەشىم شىعاردى. ياعني ماسكەۋ تاراپى 2024 جىلى بەلارۋس يمپورتتايتىن مۇنايعا باج سالىعىن سالاتىنىن ايتتى. وسى مالىمدەمەدەن كەيىن مينسك پەن ماسكەۋ قاتىناسىنا سىزات تۇسە باستادى.

"The Qazaq Times"