پاكىستاندا قىتايلىق ينۆەستورلارعا تەررورلىق شابۋىل جاسالدى

وتكەن اپتا سوڭىندا پاكىستاننىڭ بەلۋدجيستان پروۆينتسياسىنىڭ گۆادار قالاسىنداعى قىتاي ينۆەستورلارىنا تاۋەلدى قوناق ۇيگە تەررورلىق شابۋىل جاسالعان. پاكىستان رەسميلەرى شابۋىلدا 5 ادامنىڭ قازا تاپقانىن مالىمدەدى.

شابۋىلدى سول ەلدەگى "بەلۋدجيستان ازاتتىق ارمياسى" دەپ اتالاتىن تەررورلىق ۇيىم ءوز موينىنا العان. اتالعان تەررورلىق توپ الەۋمەتتىك جەلىلەر ارقىلى جاساعان مالىمدەمەسىندە،  شابۋىلدىڭ قىتايلىق جانە وزگە دە شەتەلدىك ينۆەستورلارعا باعىتتالعانىن اشىق ايتقان جانە شابۋىل جاساۋشى 4 ادامنىڭ  فوتو سۋرەتتەرىن دە جاريا ەتكەن. سونداي-اق، الداعى ۋاقىتتا دا بۇنداي ماقساتتى شابۋىلداردىڭ قايتالاناتىنىن ەسكەرتكەن.

قىتايلىق ينۆەستورلار جاعىنان سالىنعان بەس جۇلدىزدى قوناق ءۇي سول ايماقتاعى بىردەن-ءبىر جوعارى دارەجەلى مەيمانحانا. وعان  قىتايلىق ينۆەستورلار مەن بيزنەس وكىلدەرى كوبىرەك تۇرادى.

پاكىستان قارۋلى كۇشتەرى جاساعان مالىمدەمەدە، جەكسەنبى كۇنى قوناق ۇيگە جاسىرىنعان لاڭكەستەرگە قارسى قارۋلى وپەراتسيا جاسالعان. وپەراتسيادا 4 قارۋلى سودىر قولعا تۇسكەن. بىراق، ولاردىڭ وققا ۇشقانى نەمەسە تۇتقىندالعانى اشىق ايتىلماعان. بۇدان تىس شابۋىلدا زارداپ شەككەندەر تۋرالى دا تولىق مالىمەت تاراتىلماعان.

اراب تەڭىزىندەگى ەڭ ۇلكەن پورتتاردىڭ ءبىرى گۆادار پورتى قىتايدىڭ باسقارۋىنا وتكەن. پاكىستان مەن قىتاي ۇكىمەتى اراسىندا ءىرى ينۆەستيتسيالىق جوبالار جاسالاۋدا. الايدا، جەرگىلىكتى توپتاردىڭ قىتايلىق ينۆەستورلارعا قارسىلىعى بارعان سايىن ارتىپ كەلەدى.

“The Qazaq Times”