فوتو: Oxu.az

«اقش ۆەنەسۋەلا اۋماعىنادا اسكەري وپپەراتسيالار جۇرگىزۋگە دايىن» - دەپ مالىمدەدى اقش مەملەكەتتىك حاتشىسى مايكل پومپەو «Fox Business» تەلەارناسىنا بەرگەن سۇحباتىندا.

«اقش پرەزيدەنتى دونالد ترامپ اشىق ءارى ايقىن «اسكەري وپەراتسيا بولۋى مۇمكىن» ەكەندىگىن ايتتى. ەگەر اسكەر كىرگىزۋ قاجەت بولسا، اقش ونى ىستەيدى» - دەدى پومپەو.

بۇدان بولەك پومپەو اقش-تىڭ زورلىق-زومبىلىققا قارسى ەكەندىگىن جانە ۆەنەسۋەلا پرەزيدەنتى نيكولاس مادۋرونىڭ بەيبىت جولمەن بيلىكتەن كەتەتىندىگىنە ۇمىتتەنەتىنىن ايتتى.

بىراق Reuters اقپارات اگەنتتىگى ءوزىنىڭ جەكە اقپارات كوزدەرىنە سۇيەنىپ، اق ءۇيدىڭ پەنتاگونعا ۆەنەسۋەالاعا بايلانىستى ەشقانداي بۇيىرىق بەرمەگەنىن جازدى. اقش قورعانىس ءمينيسترىنىڭ حالىقارالىق قاۋىپسىزدىك بويىنشا كومەكشىسى كەترين ۋيلبارگەردىڭ سوزىنشە، «پەنتاگون كەز كەلگەن توتەنشە جاعدايعا بايلانىستى قوسالقى جوسپارلاردى دايىندايدى».

بۇعان دەيىن مايك پومپەو ۆەنەسۋەلا پرەزيدەنتى نيكولاس مادۋرونىڭ ەلدەن كەتپەك بولعاندىعىن، بىراق ونى رەسەي بيلىگى توقتاتقاندىعىن ايتقان. اقش مەملەكەتتىك حاتشىسىنىڭ سوزىنشە، كاراكاس اۋەجايىندا مادۋروعا ارنالعان ۇشاق دايىن تۇرعان. ول ونى كۋباعا جەتكىزۋى ءتيىس بولعان. كەيىننەن پومپەونىڭ بۇل مالىمدەمەسىن ۆەنەسۋەلا مەن رەسەي جوققا شىعاردى. رەسەي ءسىم رەسمي وكىلى ماريا زاحاروۆا: «ۋاشينگتون ۆەنەسۋەلا ارمياسىنا مورالدىق تۇرعىدان اسەر ەتۋ ءۇشىن جالعان اقپارات تاراتۋدا. بۇل اقپاراتتىق شابۋىلدىڭ ءبىر ءتۇرى» - دەپ مالىمدەدى.

ءساۋىر ايىنىڭ 30-ى كۇنى وپپوزيتسيالىق ساياساتكەر حۋان گۋايدو حالىق پەن ارميانى پرەزيدەنت نيكولاس مادۋرونى ورنىنان الىپ تاستاۋعا شاقىرىپ، ءوز ۇندەۋىن «بوستاندىق» وپەراتسياسىنىڭ سوڭعى كەزەڭى دەپ باعالاعان. مادۋرو بيلىگى شەرۋگە شىققاندارعا قارسى گاز قولدانىپ، حالىقتى اسكەري تەحنيكانىڭ كۇشىمەن تاراتقان.

ۆەنەسۋەالاداعى ساياسي داعدارىس قاڭتار ايىنىڭ 23-ءى كۇنى باستالعان. ءدال وسى كۇنى حۋان گۋايدو ءوزىن «ەلدىڭ ۋاقىتشا پرەزيدەنتىمىن» - دەپ جاريالاعان. ونى اقش، ەۋرووداق جانە لاتىن امەريكاسىنىڭ بىرقاتار مەملەكەتتەرى مويىنداعان.

"The Qazaq Times"