پاكىستان: اۋعانستاندا بەيبىتشىلىك ورناماي «ءبىر بەلدەۋ، ءبىر جول» جوباسى جۇزەگە اسپايدى

پاكىستان باسشىسى جەكسەنبىدە جاساعان مالىمدەمەسىندە، اۋعانستاننىڭ بەيبىتشىلىگى تەك قانا پاكىستان ءۇشىن عانا ماڭىزدى ەمەس ەكەنىن، قىتايدىڭ «ءبىر بەلدەۋ، ءبىر جول» باعدارلاماسى بويىنشا ورتا ازيا ەلدەرمەن ەكونوميكالىق بايلانىسىن نىعايتۋىنىڭ باستى شارتى بولاتىنىن ەسكەرتتى.

يرمان حان سوزىندە اۋعانستاننىڭ بەيبىتشىلىگى قىتايدىڭ «ءبىر بەلدەۋ، ءبىر جول» باعدارلاماسىنىڭ ماڭىزدى كەپىلى ەكەنىن، ورتالىق ازيا ەلدەرىنە تابىس اكەلەتىن جوبا ءۇشىن اۋعانستانداعى بەيبىتشىلىكتىڭ ماڭىزدى ەكەنىن اتاپ كورسەتكەن.

پاكىستان ۇكىمەتىنىڭ باسشىسى اقش پەن وزگە دە تاراپتاردان اۋعانستانداعى بەيبىتشىلىك كەلىسسوزدەرىن العا جىلجىتۋدى تاعى ءبىر رەت تالاپ ەتكەن. «40 جىلدىق سوعىستان كەيىن اۋعانستان حالقىنا بەيبىتشىلىك كەرەك. اۋعانستاندا بەيبىتشىلىكتىڭ ورناۋى اۋعانستان مەن پاكىستان عانا ەمەس، قىتايدىڭ «ءبىر بەلدەۋ، ءبىر جول» باعدارلاماسىنىڭ جۇزەگە اسۋىنا جانە ورتا ازيا ەلدەرىنىڭ تابىس تابۋىنا العى شارت بولىپ سانالادى»، – دەگەن.

پرەمەر-مينيستر  يرمان حان پاكىستان مەن ورتالىق ازيا ەلدەرى اراسىندا قارىم-قاتىناستى دامىتۋ ءۇشىن دە، ەڭ اۋەلى اۋعانستاندا ورنىقتىلىقتىڭ بولۋى اسا ماڭىزدى ەكەنىن اتاپ كورسەتكەن.

قۇراما شتاتتار اۋعانستاننىڭ ىشكى ديالوگىن قالىپتاستىرۋعا بارىنشا كۇش سالۋىن ءۇمىت ەتكەن يرمان حان پاكىستان ۇكىمەتى دە اۋعانستان بەيبىتشىلىگى ءۇشىن بار كۇشىن سالاتىنىن جەتكىزگەن.

قازىرگى كەزدە، قىتاي مەن پاكىستان ميللياردتاعان ينۆەستيتسيالىق قارجى سالىنعان قىتاي-پاكىستان ەكونوميكالىق ءدالىزىن اۋعانستانعا قاراي كەڭەيتۋدى جوسپارلاۋدا. بۇل جوسپار دا قىتايدىڭ اتالمىش اۋقىمدى جوباسىنىڭ ءبىر پاراسى بولىپ سانالادى. دەگەنمەن، قىتاي ۇكىمەتى اۋعانستان جاعدايىنان الاڭدايدى. وسىدان بۇرىن «يسلام مەملەكەتى» تەررورلىق ۇيىمى اۋعانستانعا شەگىنگەندە قىتاي سولتۇستىك-باتىس شەكاراسىنداعى شىنجاڭدا ۇلكەن ساياسي ناۋقان جۇرگىزىپ، ءجۇز مىڭداعان ادامدى ساياسي لاگەرلەرگە قاماعان بولاتىن.

“The Qazaq Times”