زەلەنسكي رەسەيلىكتەرگە ۋكراينا ازاماتتىعىن ۇسىندى

ۋكراينانىڭ جاڭا سايلانعان پرەزيدەنتى ۆلاديمير زەلەنسكي رەسەي پرەزيدەنتى ۆلاديمير ءپۋتيننىڭ رەسەي ازاماتتىعىن بەرۋ تۋرالى شەشىمىنە قاتاڭ جاۋاپ قايتاردى.  رەسەي پاسپورتىن بەرۋ تۋرالى جارلىققا پرەزيدەنت پۋتين وتكەن سارسەنبى كۇنى قول قويعان بولاتىن.

رەسەي پرەزيدەنتىنىڭ بۇل قادامىن ۋكراينانىڭ جاڭا سايلانعان پرەزيدەنتى زەلەنسكي ءوزىنىڭ الەۋمەتتىك جەلى پاراقشاسى ارقىلى ايىپتادى. ول «فەيسبۋك» پاراقشاسىندا: «ۋكراينالىقتار ەل، ەركىن مەملەكەتتە جاسايدى. ۋكراينا ءوز ازاماتتىعىن اۆتوريتارلىق جانە كوررۋپتسيالىق رەجيمدە قينالىپ جاتقان بارلىق ادامعا، اسىرەسە كوبىرەك قينالىپ جاتقان رەسەيلىكتەرگە ۇسىنادى»، – دەپ جازعان.

قازىر، ەكى ەل اراسىندا قايشىلىق كۇشەيىپ تۇر. وتكەن اپتادا ۋكراينا جوعارى راداسى مەملەكەتتىك ءتىل تۋرالى زاڭدى قابىلداپ، ۋكراين ءتىلىن بىردەن ءبىر مەملەكەتتىك ءتىل ەتىپ بەكىتتى. سونداي-اق، زاڭ جوباسىندا ورىس ءتىلى تۋرالى مۇلدە ءسوز ەتىلمەگەن. ال، رەسەي تارابى ۋكراينانىڭ شىعىسىنداعى وزدەرىن «دونەتسك جانە لۋگانسك حالىقتىق رەسپۋبليكاسى» دەپ اتاپ العان سەپاراتيستەر باقىلاۋىنداعى ايماق تۇرعىندارىنا رەسەي ازاماتتىعىن جەڭىلدەتىلگەن جولمەن بەرۋ تۋرالى شەشىم شىعارعان بولاتىن.

“The Qazaq Times”