«شىڭجاڭ تەلەۆيزياسى» تۇسىرگەن جاڭا جوبانىڭ ءبىرى – «جىلقى جالىنداعى مادەنيەت». ارىسى ادامزات وركەنيەتىندە ۇلكەن ماڭىزعا يە، بەرىسى قازاق دەيتىن ۇلتتىڭ شارۋاشىلىعىمەن، ومىرىمەن، ءتىپتى رۋحاني جان-دۇنيەسىمەن بىتە قايناسىپ كەتكەن، ءوسىبىر قاسيەتتى تۇلىك تۋرالى تەرەڭنەن قوزعاپ، جان-جاقتى قاۋزاپ، عالىم، تاريحشى، ەتنوگراف مامانداردىڭ پىكىرىن ۇسىنا وتىرىپ جاساعان دەرەكتى فيلم، قالىڭ وقىرماننىڭ ۇلكەن قىزىعۋشىلىعىن تۋدىرىپ، ىقىلاسىنا بولەنگەن ەدى. «شىڭجاڭ تەلەۆيزياسىنداعى» قانداستارىمىز ومىرگە اكەلگەن تارتىمدى ءارى تاعىلىمدى دۇنيەنى قارا شاڭىراق قازاقستانداعى كورەرمەن قاۋىمعا دا ۇسىنۋدى ءجون كوردىك.

فيلم «وتىز جىلدىڭ ورىندە» اتتى تاڭدامالى دەرەكتى فيلمدەردىڭ قاتارىنا ەنگەن.

ءفيلمنىڭ ءبىرىنشى بولىمىندە رەتىنە قاراي تاريحشى جاقىپ مىرزاحانۇلى، قالامگەر بارات كادىنۇلى، اۋىل شارۋاشىلىعى عىلىمىنىڭ دوكتورى گىمىڭگۇل مۇقانتايقىزى، شىڭجاڭ اۋىل شارۋاشىلىعى ۋنيۆەرسيتەتىنىڭ دوتسەنتى نۇرجان ءماديارۇلى، قازاقستان عالىمى، تاريح عىلىمدارىنىڭ دوكتورى احمەت توقتىباەۆ، مادەنيەت زەرتتەۋشى كارىم دۇيسەنبايۇلى، جازۋشى باعاشار نارىنبايۇلى، جاڭالىق نۇرتازاۇلى، نۇردانعازى ريزابايۇلى قاتارلى ادامدار ءوز ويلارىمەن ءبولىستى. جۇرگىزۋشى قۋانىش ءىلياسۇلى.

(ەستەرىڭىزگە سالا كەتەيىك، سايتتىڭ وتكەن جاريالانىمدارىندا «وتىز جىلدىڭ ورىندە» اتتى تاڭدامالى دەرەكتى فيلمدەر توپتاماسىنان "وتار كوش" دەرەكتى فيلملدەرىن ۇسىنعان بولاتىنبىز).

جوبا جەتەكشىسى: قانات ەرەجەپۇلى، مانەن زەينەلۇى

ستسەناريست-رەجيسسەر: قۋانىش ءىلياسۇلى

باس وپەراتورلار: بىرلىك نازىربەكۇلى، ءۋالي قاليحان

ءماتىنىن وقىعان: قانات ەرەجەپۇلى

فيلمگە وزگە دە ماماندار اتسالىسقان.

“The Qazaq Times”