قازاقستان رەسپۋبليكاسى سىرتقى ىستەر مينيسترلىگى كەشە شري-لانكا ورتالىق قالاسى مەن بىرنەشە ءىرى قالالارىندا بولعان تەرروريستىك شابۋىلداردى ايىپتادى. بۇل تۋرالى سىرتقى ىستەر مينيسترلىگىنىڭ رەسمي سايتىندا جازباشا مالىمدەمە تاراتتى.

مالىمدەمەدە قازاقستان تارابىنىڭ 21 ساۋىردە شري-لانكا استاناسى كولومبودا جانە نەگومبو مەن باتتيكالوا قالالارىندا بولعان تەرروريستىك شابۋىلداردى قاتاڭ ايىپتايتىنى ايتىلعان. قازاقستان تارابى تەرروريزمنىڭ كەز-كەلگەن كورىنىستەرىنە قارسى ەكەنىن، تەرروريزمگە قارسى كۇرەستى بەلسەندى تۇردە قولدايتىنىن جەتكىزگەن.

بۇعان قوسا مالىمدەمەدە، تەرروريزمگە قارسى كەڭ اۋقىمداعى حالىقارالىق كواليتسيا قۇرۋ ارقىلى لاڭكەستىككە قارسى كۇرەستەگى حالىقارالىق ارەكەتتەردى ۇيلەستىرۋگە شاقىرعان. ءارى، شري-لانكاداعى شابۋىلدان كوز جۇمعان بەيبىت تۇرعىنداردىڭ تۋعان-تۋىستارىنا كوڭىل ايتقان.

ايتا كەتەيىك، كەشە شري-لانكانىڭ بىرنەشە قالاسىندا تەررورلىق شابۋىل بولىپ، شىركەۋ مەن قوناق ءۇي جانە الەۋمەتتىك ورىندارعا باعىتتالعان شابۋىلدان 250-دەن استام ادام كوز جۇمىپ، 400-دەن استام ادام زارداپ شەككەن بولاتىن. قازىرگە دەيىن بىردە ءبىر ۇيىم تەررورلىق شابۋىلدى ءوز موينىنا العان جوق. الايدا، ەلدىڭ قورعانىس ءمينيسترى شابۋىلدى كىمدەردىڭ ۇيىمداستىرعانىن بىلەتىنىن ايتقان.

“The Qazaq Times”