ەۋروپا جاڭا ۆيزالىق كودەكستى بەكىتتى

ەۋروپا پارلامەنتى ەو ەلدەرىنىڭ جاڭا ۆيزالىق كودەكسىن بەكىتتى، دەپ حابارلايدى نandelsblatt.com.

قازىرگى ۋاقىتتا شەنگەن ايماعىنا كىرۋ ءۇشىن 100-دەن استام ەلدىڭ ازاماتتارىنا ۆيزا رەسىمدەۋ قاجەت. سوڭعى بىرنەشە جىلدا ۆيزا الۋعا تاپسىرىلعان وتىنىشتەردىڭ كولەمى 50% ارتقان. وسى رەتتە ەۋروپالىق وداق قۇرامىنا ەنبەيتىن جۇزدەن استام مەملەكەتتىڭ ازاماتتارىنا ۆيزا بەرۋ ءتارتىبى مەن شارتتارىنا وزگەرتۋ ەنگىزىلەدى. توقسان كۇنگە دەيىنگى قىسقا مەرزىمدى ساپارلارعا ءوتىنىم جولداۋ جانە ولاردى بەرۋ پروتسەدۋرالارى جەڭىلدەتىلەدى. ەۋروپارلامەنت حابارلاماسىندا ايتىلعانداي، وزگە مەملەكەتتەرمەن ميگراتسيا سالاسىنداعى ىنتىماقتاستىق قۇرۋ ماقساتىندا ۆيزا بەرۋ جەڭىلدەتىلەدى.

اتالعان قۇجات بويىنشا ۆيزا الۋعا ءوتىنىش ساپار جوسپارلانعان كۇنگە دەيىن التى اي ىشىندە (قازىرگى ءۇش ايدىن ورنىنا) جانە كەم دەگەندە 15 كۇن بۇرىن بەرىلۋى ءتيىس. ۆيزانىڭ قۇنى 60 ەۋرودان 80 ەۋروعا قىمباتتادى. دەگەنمەن، عالىمدار مەن ستۋدەنتتەر بۇرىنعىشا ۆيزالىق الىمنان بوساتىلىپ، 18 جاسقا دەيىنگى جاسوسپىرىمدەر مەن 6 جاسقا دەيىنگى بالالارعا ارنايى جەڭىلدىكتەر قاراستىرىلادى.

ۆيزالىق ساياساتقا ەنگىزىلگەن وزگەرىستەرگە قاتىستى بولگاريانىڭ پرەمەر-ءمينيسترى ۆالەنتين رادەۆ: «كوشى-قون پروتسەستەرىن ءتيىمدى باسقارۋ كەلۋگە قاقىسى جوق ازاماتتاردى قايتارۋىمىزعا مۇمكىندىك بەرەدى. ۆيزالىق كودەكستىڭ جاڭا ەرەجەلەرى ءوز ازاماتتارىن قايتارعىسى كەلمەيتىن ءۇشىنشى جاقتاعى مەملەكەتتەرگە جاۋاپ قايتارۋ ءۇشىن تاعى ءبىر تەتىك بەرەدى»، – دەيدى. ەندى ەۋروپا پارلامەنتى ۇسىنعان جاڭا ەرەجەنى ەو كەڭەسى بەكىتسە، التى ايدان سوڭ كۇشىنە ەنەدى.

"The Qazaq Times"