فوتو: https://bbc.uk

جۋرناليستيكا سالاسىنداعى ەڭ ءىرى ماراپات پۋليتتسەر سىيلىعىن دونالد ترامپتىڭ وتباسى مەن قارجىلارى تۋرالى جازعان New York Times»، «Wall Street Journal» تىلشىلەرى جانە بىلتىر رەداكتسياسىنا شابۋىل جاسالعان «Capital Gazette» باسىلىمى يەلەندى.  

مەريلەند شتاتىنداعى «Capital Gazette» باسىلىمىنىڭ ءتورت ءجۋرناليسى قارۋلى ەر ادامنىڭ شابۋىلىنان قازا تاپتى. قايعىلى وقيعاعا قاراماستان، شابۋىلدان كەيىن كەلەسى كۇنى رەداكتسيا جۇمىسقا شىعىپ، گازەتتىڭ جۇماداعى سانىن قازا تاپقان ارىپتەستەرىنە ارنادى. كەيىننەن شابۋىل جاساعان ادامنىڭ بۇرىن گازەتكە قارسى سوتتا جەڭىلىس تاپقانى ءۇشىن تىلشىلەردى ادەيى ولتىرگەنى انىقتالدى.

پۋليتتسەر ماراپاتىن يەلەنگەن گازەت رەداكتسياسىنا ءجۇز مىڭ دوللار كولەمىندە سىياقى بەرىلدى.

«New York Times» گازەتى دونالد ترامپتىڭ سالىق تولەۋدەن جالتارعانى تۋرالى كولەمدى زەرتتەۋ-ماقالا جاريالاعان بولاتىن. اتالعان باسىلىمنىڭ جۋرناليستەرى دەۆيد بارستوۋ، سيۋزاننا كرەيگ پەن راسس بيۋتتنەر سىيلىقتى ترامپ قارجىسى جايلى، ونىڭ «بيزنەس-يمپەرياسىنا قولداۋ بولعان سالىقتان جالتارۋ امالدارى» جايلى زەرتتەۋى ءۇشىن الدى. گازەت تىلشىلەرى 1990 جىلدارى اقش-تىڭ قازىرگى پرەزيدەنتى كۇماندى وپەراتسيالارعا قاتىسقانى تۋرالى دا جازعان. وتكەن جىلى قازاندا نيۋ-يورك شتاتىنىڭ سالىق ينسپەكتسياسى گازەتتىڭ ماتەريالدارى بويىنشا دونالد ترامپتىڭ مۇلكىنە تەرگەۋ جۇرگىزىپ جاتقانىن راستادى.

«Wall Street Journal» جۋرناليستەرى دە ترامپ تۋرالى تەرگەۋ ءۇشىن پۋليتتسەر سىيلىعىن الدى. ءدال وسى گازەت ترامپپەن (ولاردىڭ ىشىندە ستورمي دەنيەلس) بايلانىس جاساعان ايەلدەرمەن تىلدەسىپ، ولاردىڭ كەيبىرەۋلەرىنە پرەزيدەنتتىڭ اقشا بەرگەنىن جازدى.

قوعامدىق جۇمىس ءۇشىن بەدەلدى جۇلدەنى فلوريدا قالاسىنداعى ماردجەري ستوۋنمەن دۋگلاس اتىنداعى مەكتەپتەگى قارۋلى شابۋىل سالدارىن جاريالاعانى ءۇشىن «South Florida Sun Sentinel» الدى. باسىلىم تىلشىلەرى بيلىكتىڭ وقىس جاعدايلارعا دايىن ەمەستىگى، مەكتەپ اكىمشىلىگى مەن پوليتسيا قىزمەتكەرلەرىنىڭ قاتەلىگى تۋرالى ماتەريالدار سەرياسىن شىعاردى.

پۋليتتسەر سىيلىعىن يەلەنگەن ۇزدىكتەر قاتارىندا Associated Press, «Reuters» سىندى الپاۋىت اگنەتتىكتەر دە بار. «حالىقارالىق رەپورتاج» نوميناتسياسىن يەمەندەگى سوعىس سالدارى تۋرالى جازعان Associated Press جۋرناليستەرى مەن ميانماداعى مۇسىلمان روحيندجالار تۋرالى جازىپ، كەيىن بيلىك تۇرمەگە كەسكەن Reuters اگەنتتىگىنىڭ ەكى ءتىلشىسى الدى.ادەبيەت سالاسىنداعى سىيلىق ريچارد پاۋەرس پەن دجەكي سيببليس درەري بەرىلدى. ال «Reuters» فوتوتىلشىلەرى اقش شەكاراسىنداعى ميگرانتتار بەينەلەنگەن سۋرەتتەرى ءۇشىن جۇلدە يەمدەندى.

پۋليتتسەر سىيلىعىنىڭ تاريحى سوناۋ 1917 جىلدان باستالادى: سول جىلى امەريكاندىق جۋرناليست گەربەرت بايارد سۆوپ 1916 جىلدىڭ  قازان ايىندا «New York World» گازەتىندە  جاريالانعان  «گەرمانيا  يمپەرياسىنا ىشتەن كوزقاراس» دەگەن تاقىرىپتاعى ماتەريالدار سەرياسى ۇشىن العاشقى سىيلىق  العان ەدى. قازىرگى ۋاقىتتا 21 اتالىمدا جۋرناليستيكا سالاسىنداعى جەتىستىكتەرى ءۇشىن، سونداي-اق ادەبيەت، دراماتۋرگيا، تاريح جانە مۋزىكا سالاسىنداعى جەتىستىكتەرى ءۇشىن بەرىلەدى.

"The Qazaq Times"