ناتو تۇركيانىڭ رەسەيلىك اۋە قورعانىس جۇيەسىن پايدالانۋىنا قارسى ەمەس

ناتو-نىڭ پارلامەنتارلار اسسامبلەياسىنىڭ 99-ءشى سەمينارى انتاليادا ءوتتى. كەزەكتى سەمينار وتىرىسى ۇيىمنىڭ جەرورتا تەڭىزى مەن تاياۋ شىعىس ماسەلەلەرىنە قاتىستى جوسپارلارىن تالقىعا سالعان.

سەمينار كەزىندە تۇركيانىڭ رەسەيلىك S-400 اۋە قورعانىس جۇيەسىن ساتىپ الۋى تۋرالى دا ءسوز بولعان. اسسامبلەيا ءتورايىمى مادەلەين مۋن تۇركيانىڭ ۇيىمداعى ماڭىزدى ءرولىن ايتا كەلىپ، اۋە قورعانىسىن قامتاماسىز ەتۋدە جاساپ جاتقان قادامدارىن قولدايتىنىن بىلدىرگەن.

تۇركيانىڭ رەسەيدەن اۋە قورعانىس قۇرىلعىلارىن ساتىپ الۋى ناتو-داعى وداقتاسى بولعان اقش-تىڭ نارازىلىعىن تۋدىرعان بولاتىن. اقش تارابى رەسەيلىك اۋە قورعانىس جۇيەسى ناتو پايدالاناتىن امەريكالىق جانە ەۋروپالىق اسكەري ۇشاقتار مەن وزگە تەحنيكالارعا سايكەس كەلمەيتىنىن، بۇل قورعانىس جۇيەسى F-35 ۇشاقتارى ءۇشىن دە قاۋىپتى ەكەنىن ەسكەرتكەن.

تۇركيانىڭ بۇل شەشىمى ءۇشىن اقش F-35 جاۋىنگەرلىك ۇشاقتارى مەن ونىڭ بولشەكتەرىن جەتكىزىپ بەرۋدى توقتاتقان. الايدا، وسىنىڭ ءوزى انكارانى العان بەتىنەن قايتارا المادى. دەگەنمەن، تۇركيانىڭ رەسەيلىك اۋە قورعانىس جۇيەسىن پايدالانۋعا ناتو مۇشەلەرى تولىقتاي قارسى ەمەس.

 “The Qqazaq Times”