اراب ەلدەرى اراسىندان بىرىككەن اراب امىرلىگى F-35 ۇشاقتارىنا يە بولاتىن العاشقى ەل بولماق. ترامپ ۇكىمەتى بيلىكتى وتكىزدىپ بەرۋدەن بۇرىن ءباا-ءنىڭ وسى جونىندەگى ءوتىنىشىن ماقۇلداعان.

الەمدەگى ەڭ وزىق سوعىس ۇشاعى سانالاتىن F-35-ءتى قۇراما شتاتتار، كانادا، بريتانيا، تۇركيا سەكىلدى ەلدەر بىرلەسىپ وندىرەدى جانە ونى تەك ساناۋلى ەلدەر عانا پايدالانا الادى. دەگەنمەن، ترامپ ۇكىمەتىنىڭ تۇسىندا اتالعان وزىق ۇشاقتاردىڭ پايدالانۋ كولەمى كەڭەيگەندەي بولدى. سولاردىڭ قاتارىندا بىرىككەن اراب امىرلىگىنىڭ F-35 ۇشاقتارىن ساتىپ الۋ تالابى اقش تارابىنان ماقۇلداندى.

بىرىككەن اراب امىرلىگى اقش-تىڭ شىعاناق ماڭىنداعى ماڭىزدى وداقتاستارىنىڭ ءبىرى سانالىپ كەلگەن. بىراق، كوپ جىلدار بويى اقش-تان F-35 ۇشاقتارىن ساتىپ الۋ ءوتىنىشىن قاناعاتتاندىرا الماي كەلگەن. بىلتىر ءباا يزرايلمەن بەيبىت قارىم-قاتىناس ورناتقاننان كەيىن قۇراما شتاتتارعا قويعان بۇل تالابى ورىندالىپ وتىر.

ءباا-نىڭ F-35 ۇشاقتارىنا قول جەتكىزۋى مۇمكىن ەكەنىن ەكى ەل ۇكىمەتتەرىندەگى سەنىمدى اقپارات كوزدەرىنە سۇيەنە وتىرىپ رەيتەر اگەنتتىگى حابارلاعان بولاتىن. حابارعا قاراعاندا اقش تارابى بەكىتكەن ساۋدا بويىنشا ءباا 50 F-35 ۇشاعىمەن قوسا 18 ۇشقىشسىز ۇشاقتاردى ساتىپ الادى.

دەگەنمەن، ساراپشىلاردىڭ بولجاۋىنشا، كەلىسىمدى مىندەتىن جاڭا باستاعان بايدەن ۇكىمەتى قايتا قاراۋى دا مۇمكىن.

“The Qazaq Times”