ۇكىمەتتەردىڭ بەت پەردەسىن اشىپ تاستاعان جۋليان اسسانج تۇتقىندالدى

Wikileaks سايتىنىڭ نەگىزىن سالۋشى جۋليان اسسانج ەكۆادوردىڭ لوندونداعى ەلشىلىگىندە قولعا الىندى. ەكۆادوردىڭ پرەزيدەنتى جۋليان اسسانجدى حالىقارالىق كونۆەنتسيالاردى بىرنەشە رەت بۇزعانى ءۇشىن ساياسي باسپانا بەرۋ ۇسىنىسىن قابىلداماعانىن مالىمدەگەن. ال، Wikileaks سايتى ەكۆادوردى ساياسي باسپانا بەرمەگەنى ءۇشىن حالىقارالىق ەرەجەنى بۇزدى دەپ جازدى.

47 جاستاعى جۋليان اسسانج اۋستراليا ازاماتى. ول Wikileaks سايتى ارقىلى اسا قۇپيا سانالاتىن 500 مىڭنان استام قۇجاتتىڭ ەلەكتروندى نۇسقاسىن جاريالاعان. بۇل قۇجاتتار اراسىندا الەم ەلدەرى ليدەرلەرىنىڭ قۇپيا سويلەسۋلەرى، مەملەكەتتەردىڭ قۇپيا جوسپارلارىنان تارتىپ، قارجى جىمقىرۋ، ءىرى سىبايلاس جەمقورلىق قىلمىستارىنىڭ مالىمەتتەرى دە بار. ارينە، وندا قازاقستانعا قاتىستى دا كوپتەگەن قۇپيا قۇجاتتار بولعان. جۋليان اسسانج 7 جىل بۇرىن شۆەتسياعا ەكستراديتسيادان قاشىپ بارىپ باس ساۋعالاعان بولاتىن.

ءبىر كەزدەرى Wikileaks سايتىندا جاريا بولعان اقش-تىڭ قىرعىزستانداعى  «ماناس» اۋەجايىن پايدالانۋى مەن ونىڭ جابىلۋىنا قاتىستى قۇجاتتار ورتا ازيا ەلدەرىن ءدۇر سىلكىندىرگەن ەدى. وندا اقش-تىڭ قىرعىزستانداعى اسكەري بازاسىن جابۋ ءۇشىن قىتاي ۇكىمەتى قىرعىزستانعا 3 ملرد اقش دوللارى كولەمىندە كومەك بەرگەنى تۋرالى ايتىلعان. بۇنداي مالىمەتتى سول كەزدەگى اقش-تىڭ قىرعىزستانداعى ەلشىسى دە جوققا شىعارا الماعان.

Wikileaks سايتىنىڭ ەڭ ءبىر الەمدى شۋلاتقان ءىسى اقش-تىڭ ورتالىق بارلاۋ اگەنتتىگىنىڭ قۇپيا قۇجاتتارىن اشۋى ەدى. وندا وبا-نىڭ سمارتفون،  كومپيۋتەر، سمارت-تەلەديدارلار ارقىلى ازاماتتاردى قالاي باقىلاۋعا الاتىنىن اشىپ تاستاعان. اتالعان سايت وسىلاردى جاريالاي وتىرىپ، ورتالىق بارلاۋ اگەنتتىگىنىڭ بارلاۋ ارەكەتتەرى زاڭداردىڭ شەڭبەرىنەن شىعىپ كەتكەن جوق پا دەگەن ويدى تاستاعان.

اسسانج ۇستالۋدان ءبىر كۇن بۇرىن Wikileaks سايتى وعان قارسى تىڭشىلىق وپەراتسيالاردىڭ بولىپ جاتقانىن دا جاريالاعان ەدى.

“The Qazaq Times”