قازاقستان تاجىكستانعا قارۋ-جاراق جەتكىزەدى

سەنات قازاقستاننىڭ قارۋ-جاراعىن تاجىكستانعا بەرۋ تۋرالى زاڭ جوباسىن ماقۇلدادى

قابىلدانعان زاڭ جوباسىنا ساي، قازاقستان قارۋ-جاراقتى دۋشانبەگە جەتكىزۋ شىعىنىن ءوزى وتەيدى، ال تاجىكستان قارۋدى ءۇشىنشى قولعا وتكىزبەۋگە مىندەتتەلەدى. سونىمەن قاتار، قازاقستان تاجىكستانعا ءبىر رەت قارۋ-جاراق، اۋەدەن زاقىمداۋ قۇرالدارى، ارتيللەريالىق قۇرالدار، رادياتسيالىق، بيولوگيالىق، حيميالىق قورعانىس مۇلىكتەرى، تىل جانە مەديتسينا مۇلىكتەرىن بەرەدى. ونىڭ ايتۋىنشا، بۇل قادام قازاقستان اسكەرى مەن قورعانىسىنا ەشقانداي زالال تيگىزبەيدى.

سەناتور تالعات مۇساباەۆ: «تاجىكستان مەن اۋعانستان شەكاراسىنداعى جاعداي كۇن سايىن ۋشىعىپ بارادى. كۇندەلىكتى ءىرى كولەمدە ەسىرتكى وتكىزبەك بولعان تەررورلىق توپتارمەن اتىس-شابىس ورىن الىپ وتىر. سوندىقتان دا كورشىلەر تاراپىنان تاجىك ەلىنىڭ قارۋلى كۇشتەرىنە كورسەتىلگەلى وتىرعان تەحنيكالىق كومەك دەر كەزىندە جاسالىپ وتىر جانە بۇكىل ورتا ازيانىڭ قاۋىپسىزدىگىن قامتاماسىز ەتپەك»، – دەپ مالىمدەدى.

"The Qazaq Times"