ەۋرووداق ليۆيادا ءبىتىم ورناتۋعا شاقىردى

ەۋرووداق ليۆياداعى قاقتىعىستى توقتاتىپ، بىتىمگە كەلۋ تۋرالى ۇسىنىس ءبىلدىردى.

ليۋكسەمبۋرگتە وتكەن ەو ەلدەرىنىڭ سىرتقى ىستەر مينيسترلەرى كەڭەسىندە ەۋروپالىق ديپلوماتيا باسشىسى فەدەريكا موگەريني: «بۇۇ كوميسسياسىنىڭ ۇسىنىسى ساي بارلىق تاراپتى بەيبىت بىتىمگە شاقىرامىز. سونداي-اق اسكەري قاقتىعىستى شەكتەۋدى تالاپ ەتەمىز. جانە بۇۇ شەڭبەرىندە ماسەلەنى كەلىسسوزدەر ارقىلى شەشۋدى ۇسىنامىز. سەبەبى تريپوليدەن جەتكەن اقپاراتتار كوڭىل كونشىتپەيدى»، – دەدى. ەۋروپالىق وداق وكىلدەرىنىڭ ايتۋىنشا، ليۆيا تاراپى ەڭ الدىمەن گۋمانيتارلىق ءبىتىم ورناتىپ، ساياسي كەلىسسوزدەرگە ورالۋ قاجەت.

2011 جىلى مۋاممار كاددافيگە قارسى وتكەن ازامات سوعىسىنان كەيىن ليۆياداعى جاعداي ناشارلاپ كەتكەن بولاتىن. سول ۋاقىتتان بەرى حالىق نارازىلىعى ارتىپ، قارۋلى قاقتىعىستار تولاستاعان جوق. وسى جىلى ليۆيا استاناسى تريپولي قالاسىنداعى قاقتىعىس سالدارىنان 40-قا جۋىق ادام جاراقات العان. ءتريپوليدىڭ وڭتۇستىك جانە باتىس اۋداندارى ءالى كۇنگە دەيىن ءبىر-بىرىنە شابۋىل ۇيىمداستىرىپ كەلەدى. ەكى تاراپ بىرجاقتى ءبىتىم جاساۋعا كەلىسسە دە، ءىس ويداعىداي ناتيجە بەرگەن جوق.

قازىرگى ۋاقىتتا تريپولي حالقى بىرنەشە انكلاۆقا بولىنگەن. ولاردى ءارتۇرلى توپتار باقىلاۋعا العان. جان-جاققا شاشىلعان حالىق پەن ەلدەگى بەيبەرەكەتسىزدىكتىڭ كەسىرىنەن ليۆيا بوسقىنداردىڭ تەڭىز ارقىلى ەۋروپاعا باراتىن نەگىزگى ترانزيتتىك پۋنكتىنە اينالدى.

"The Qazaq Times"