يزرايل پرەمەر-ءمينيسترى بەنيامين نەتانياحۋ ماسكەۋگە رەسمي ساپارمەن بارىپ، رف پرەزيدەنتى ۆلاديمير پۋتينمەن كەزدەستى. كەزدەسۋدە ەكى ۇكىمەتتىڭ جوعارى لاۋازىمدىلارى قازىرگى ەڭ شيەلەنىستى ماسەلەلەردى تالقىعا سالعان.

پۋتين مەن نەتانياحۋ اراسىنداعى كەزدەسۋگە رەسەي مەن ءيزرايلدىڭ سىرتقى ساياسي ۆەدومستۆو باسشىلارى، ەل باسشىلارىنىڭ سىرتقى ساياساتتاعى ارنايى كەڭەسشىلەرى جانە ۇكىمەتتەگى جوعارى لاۋازىمدىلار قاتىسقان.

ورتا شىعىستاعى سوڭعى داعدارىس تۇيىندەرى يزرايل مەن ءسۇريا شەكارا ماسەلەلەرى كەزدەسۋدىڭ باستى تاقىرىبى بولدى.

اقش پرەزيدەنتى دونالد ترامپ گولان جوتاسىن يزرايل تەرريتورياسى دەپ تانيتىن قۇجاتقا قول قويۋى وڭىردەگى قايشىلىقتى اسقىندىردى. يزرايل مەن ءسۇريانىڭ جانە وزگە دە اراب ەلدەرى اراسىنداعى قايشىلىق ۇدەي ءتۇستى. سونىمەن بىرگە ءسۇريا ماسەلەسىندەگى باستى ويىنشىنىڭ ءبىرى رەتىندە رەسەي مەن يزرايل اراسىنداعى مامىلەنى بەكىتۋگە يتەرمەلەدى.

كەزدەسۋدەن بىرەر كۇن بۇرىن پۋتين ەۆرەي مەملەكەتىنىڭ باسشىسىنا قوڭىراۋ شالىپ اتالعان ماسەلەلەر تۋرالى تالقىلاعان بولاتىن. بۇل تەلەفونداعى سويلەسۋدەن بۇرىن ەكى ەلدەگى كەيبىر اقپارات قۇرالدارى نەتانياحۋ رەسەي پرەزيدەنتىنە ءسۇريا داعدارىسىن شەشۋدەگى جاڭا جوبانى ۇسىنعان دەگەن مالىمەت تاراعان. الايدا، كرەمل تارابى بۇل مالىمەتتى تەرىستەگەن.

 “The Qazaq Times”