ناتو-نىڭ 70 جاسى. ۋاشينگتوندا. فوتو: Public Radio International.

اقش ۆيتسە-پرەزيدەنتى مايك پەنس ناتو-نىڭ قۇرىلعانىنا 70 جىل تولۋىنا وراي وتكەن جينالىستا بايانداما جاساپ، ناتو-نىڭ الداعى بىرنەشە ون جىلداعى باستى پروبلەمالارىنىڭ ءبىرى – قىتاي قاۋپىنىڭ ارتۋىنا قارسى كۇرەسۋ ەكەنىن ايتتى.

«الداعى ون جىلدىقتاردا ناتو ءۇشىن ەڭ كۇردەلى ماسەلە – قىتايدىڭ ارتا تۇسكەن قاۋپىنە قارسى بەيىمدەلۋ، ءبىز بۇل مىندەت ءۇشىن رەتتەۋ جاساۋىمىز كەرەك. سەبەبى، قىتايدىڭ 5G جەلىلىك تەحنولوگياسى، «ءبىر بىلدەۋ، ءبىر جول» باعدارلاماسى ارقىلى قامتاماسىز ەتىلگەن جەلىسى – بۇلار ءبىزدىڭ ەۋروپالىق وداقتاستارىمىزدىڭ كۇن سايىن جۇمىس ىستەيتىن ماسەلەسى بولماق»، – دەدى مايك پەنس سوزىندە.

ونىڭ ايتۋىنشا، قىتايدىڭ كۇن ساناپ ارتىپ كەلە جاتقان ىقپالى امەريكا قۇراما شتاتتارىنا ەنەرگيا مەن رەسۋرستى كوپتەپ سارىپ ەتۋگە يتەرمەلەيدى. سوندىقتان، ەۋروپاداعى وداقتاستارى ناتو-نىڭ قورعانىس كۇشىن ساقتاۋ ءۇشىن قازىرگىدەن دە كوپ رەسۋرستاردى جۇمىلدىرۋعا ءتيىس.

مايك پەنس بايانداما جاساۋدا. فوتو: VOA

پەنس بايانداماسىندا «ناتو-نىڭ الداعى باستى پروبلەماسى – قىتايدىڭ ارتىپ كەلە جاتقان ىقپالىنا قارسى كۇرەسۋ» دەگەن ويدى كوبىرەك اتاپ كورسەتكەن. ول سونداي-اق، اۋستراليا، جاپونيا، سينگاپۋر جانە وڭتۇستىك كورەيا سەكىلدى ءۇندى-تىنىق مۇحيتىنداعى اقش وداقتاستارىمەن ىنتىماقتاستىقتى دامىتقانى ءۇشىن ناتو-داعى وداقتاستارىنا العىسىن دا بىلدىرگەن.

«ءبىز ناتو-داعى وداقتاستارىمىز – فرانتسيا جانە ۇلىبريتانيانىڭ ءۇندى-تىنىق مۇحيت ايماعىندا تەگىن ناۆيگاتسيا مەن ۇشۋ جۇمىستارىن ارتتىرۋ قادامدارىن قولدايمىز»، – دەگەن اقش ۆيتسە-پرەزيدەنتى.

مايك پەنستىڭ سولتۇستىك اتلانت شارتى ۇيىمىنىڭ 70 جىلدىعىندا سويلەگەن ءسوزى قۇراما شتاتتاردىڭ ناتو-داعى وداقتاستارىن ءۇندى-تىنىق مۇحيتىنداعى باستى قارسىلاسى قىتايعا قارسى بىرىگۋگە شاقىرىپ جاتقانىن انىق بايقاتتى.

“The Qazaq Times”