S-400 بەن F-35 داۋى: اقش تۇركيامەن كەلىسۋگە مۇددەلى

اقش تارابى تۇركيامەن قازىرگى داعدارىستى كەلىسسوز ارقىلى شەشۋگە تىرىسپاق. ءبىر كۇن بۇرىن اقش-تىڭ جوعارى اسكەري شەندىسى وسىنداي مالىمدەمە جاسادى.

اقش باس شتاب باسقارماسىنىڭ توراعاسى جوزەف دۋنفورد اتالعان مالىمدەمەنى وڭتۇستىك كورەيانىڭ قورعانىس مينيسترىمەن كەزدەسۋ كەزىندە جاساعان. كەزدەسۋدەن كەيىن بىرلەسكەن ءباسپاسوز ءماجىلىسى كەزىندە جوزەف دۋنفورد جۋرناليستەردىڭ اقش-تۇركيا اراسىنداعى ماسەلە تۋرالى سۇراقتارىنا جاۋاپ بەرگەن. ونىڭ ايتۋىنشا اقش-تۇركيا اراسىنداعى S-400 جانە F-35 داۋ-دامايىن ۋاشينگتون تارابى بۇتىندەي داعدارىسقا اپارعىسى كەلمەيدى.

«وزدەرىڭىز بىلەتىندەي، S-400 جانە F-35 ماسەلەسى وتە كۇردەلى. ولاردىڭ ءبىر-بىرىنە ۇقسامايتىن جۇيەلەردەن تۇراتىنى بەلگىلى. ءبىز تۇركياعا «پاتريوت» زىمىران قورعانىس جۇيەسىن ۇسىنىپ وتىرعانىمىز. جالپى ماسەلەنى كەلىسسوزدە شەشۋگە تىرىسامىز. تۇركيامەن قالايدا ءبىر كەلىسىمگە كەلەتىنىمىزگە سەنىمدىمىز»، – دەدى دۋنفورد.

اسكەري قارۋ-جاراق ساۋداسى الەمدەگى كۇردەلى ماسەلەلەردىڭ ءبىرى. ەگەر ءبىر ەل كىمنىڭ اسكەري تەحنيكاسىن پايدالانسا نەمەسە ساتىپ السا، سول ەلدىڭ قورعانىس سالاسى عانا ەمەس، تۇتاس ەكونوميكاسى ءوندىرۋشى ەلگە بايلانىستى، ءتىپتى كەي جاعدايدا تاۋەلدى بولا باستايدى. ءبىر تانك ساتىپ العان ەل ونىڭ ارتىنان تانكتىڭ تولىپ جاتقان بولشەكتەرىن دە ساتىپ الۋىنا تۋرا كەلەدى. سەبەبى، تەحنيكالاردى جاڭارتىپ وتىرۋ اسا ماڭىزدى. اسىرەسە قورعانىس تەحنيكالارى تىنباي جاڭارتىلاتىن، ناعىز قارجىنىڭ تىنباي تالاپ ەتەتىن تەتىك. بۇل رەتتە اقش الەمدى ءوزىنىڭ وزىق تەحنيكالارىمەن قامداپ قانا وتىرعان جوق، سول ارقىلى ەكونوميكاسىنا دا بەلگىلى دارەجەدە قول سالا الادى.

تۇركيانىڭ ناتو نەمەسە اقش پەن داۋى تىم ارىدان باستالعان. بۇل تەك قورعانىس تەحنيكالارىنىڭ داۋى ەمەس، سونى بەتكە ۇستاعان تۇپكى مۇددەلەردىڭ داۋ-دامايى دەۋگە بولادى.

“The Qazaq Times”