وتكەن اپتادا قىتاي توراعاسى شي جينپيڭ ەۋروپانىڭ بىرنەشە ەلىندە رەسمي ساپارمەن بارىپ، ەۋروپاداعى قىتايدىڭ ساياسي-ەكونوميكالىق قادامدارى ءۇشىن ەڭ نەگىزگى كەدەرگىلەردى جەڭىلدەتۋگە تىرىسقان ەدى. الايدا، 1 ءساۋىر كۇنى ەۋروپالىق كوميسسيا توراعاسى يۋنكەر مالىمدەمە جاساپ، قىتايدىڭ ساۋدا ساياساتىن سىنعا الدى.

يۋنكەر كوميسسيا مۇشەلەرىنە پاريجدە قىتاي باسشىسىمەن كەزدەسۋدە ايتىلعان پىكىرىن جەتكىزدى. ول قىتاي باسشىسىنا: «قىتايلىق كومپانيالار ەۋروپالىق نارىققا كىرە الادى. الايدا، ءبىزدىڭ كومپانيالار قىتاي نارىعىنا ەركىن كىرە المايدى. ءبىز بۇل جاعدايدى جالعاستى ساقتاي المايمىز»، – دەگەن. ونىڭ ايتۋىنشا قىتاي ءوز نارىعىندا ەۋروپالىق كومپانيالارعا شەكتەۋ قويادى، ال ەۋروپادا قىتاي كومپانيالارىنا شەكتەۋ جوق.

ەك توراعاسى قىتايلىق كومپانيالاردىڭ ەۋروپاداعى ينۆەستيتسياسى ەو-نىڭ سىرتقى ساياساتتاعى ماقساتتارىنا كەدەرگى كەلتىرىپ وتىر. «قىتاي كومپانياسى ەۋروپادا پورت قۇرىلىسىنا ينۆەستيتسيا سالعانى ءۇشىن، ەۋروپالىق ەلدەر قىتايدىڭ ادام قۇقىعىن قورعاۋ ساياساتىن ايىپتاي الماسا، بۇل ورىندى ەمەس»، – دەدى يۋنكەر.

ەو-عا مۇشە ەلدەر اراسىندا قىتايدىڭ «ءبىر بەلدەۋ، ءبىر جول» جوباسىنا قاتىستى پىكىر قايشىلىعى بار. ايتالىق، يتاليا ەو مەن G7 مۇشەسى بولا تۇرا جانە وزگە وداقتاس ەلدەردىڭ نارازىلىعىنا قاراماستان وتكەن اپتادا قىتايدىڭ اتالمىش جوباسى تۋرالى مەموراندۋمعا قول قويدى.

يۋنكەر ەگەر شارتتارى دۇرىس بولعان جاعدايدا قىتايدىڭ «ءبىر بەلدەۋ، ءبىر جول» جوباسىنا قارسى ەمەس ەكەنىن ايتا كەلىپ: «ەگەر بۇل جوبانىڭ قۇرىلىس الاڭدارىندا تەك قانا قىتايلىق جۇمىسشىلار مەن ينۆەستورلار عانا ەمەس، ەۋروپالىق قىزمەتكەرلەر دە بولاتىن بولسا، وندا جوبانى قولداۋعا بولادى»، – دەدى.

“The Qazaq Times”