ۋكراينا مەن رەسەي اراسىنداعى دوستىق كەلىسىمى رەسمي تۇردە كۇشىن جويدى. بۇل تۋرالى ۆۆس حابارلادى.

بىلتىر ۋكراينا پرەزيدەنتى پەتر پوروشەنكو مالىمدەمە جاساپ، رەسەيدەن ۇزاققا سوزىلعان قارۋلى قاقتىعىستان سالدارىنان بولعان شىعىنداردى ءوندىرىپ الۋ ءۇشىن شاعىمدانۋ جۇمىستارىن جۇزەگە اسىراتىن ۆەدومستۆوارالىق ورگان قۇرۋدى قاراستىرامىز دەگەن بولاتىن. سونداي-اق، «رەسەيمەن كەلىسىمنەن شىعۋ – وتارلىقتان قۇتىلىپ، ەۋروپاعا بەت الۋ ستراتەگيامىزدىڭ ءبىر بولىگى» ەكەندىگىن ايتقان. ۋكراينانىڭ بۇل قادامىن كرەمل «اقىلعا قونبايتىن ارەكەت» دەپ اتادى.

«ۋكراينا مەن رەسەي فەدەراتسياسى اراسىنداعى دوستىق، ىنتىماقتاستىق جانە ارىپتەستىك جونىندەگى كەلىسىمدى توقتاتۋ تۋرالى» زاڭ 2018 جىلى جەلتوقساندا ماقۇلدانعان بولاتىن. ۋكراينانىڭ جوعارعى راداسى 2018 جىلى 6 جەلتوقساندا قۇجات مەرزىمىن ۇزارتپاۋ تۋرالى شەشىم قابىلداعان. سول ۋاقىتتا ۋكراينانىڭ سىرتقى ىستەر ءمينيسترى پاۆەل كليمكين ۋكراين ديپلوماتتارى رەسەيمەن 48 كەلىسىمدى توقتاتقانىن، ەندى تاياۋ ۋاقىتتا 40 كەلىسىمگە دە نۇكتە قويىلاتىنىن ايتتى.

ەكى ەل اراسىنداعى دوستىق جانە ىنتىماقتاستىق جونىندەگى كەلىسىمگە 1997 جىلدىڭ 31 مامىرىندا سول كەزدەگى مەملەكەت باسشىلارى لەونيد كۋچما مەن بوريس ەلتسين قول قويعان. جوعارعى رادا مەن مەملەكەتتىك دۋما قۇجاتتى بەكىتكەننەن كەيىن، كەلىسىم 1999 جىلدىڭ 1 ساۋىرىنەن باستاپ كۇشىنە ەندى.

"The Qazaq Times"