گۋايدو 15 جىلعا بيلىكتەن الاستاتىلدى

ۆەنەسۋەلا وپپوزيتسياسىنىڭ كوشباسشىسى حۋان گۋايدوعا 15 جىل كولەمىندە باسشىلىق لاۋازىم اتقارۋعا تىيىم سالىندى – بۇل زاڭمەن قاراستىرىلعان ەڭ جوعارى مەرزىم.

مۇنداي تىيىم سالۋدىڭ سەبەبى، ۆەنەسۋەلا باقىلاۋ باسقارماسىنىڭ باسشىسى ەلۆيس اموروسونىڭ ايتۋىنشا، سالىق دەكلاراتسياسىنداعى ساياسات. قاڭتاردا ۇلتتىق اسسامبلەيا باقىلاۋىنداعى وپپوزيتسيانى باسقارعان گۋايدو ءوزىن ۋاقىتشا ۇكىمەتتىڭ باسشىسى دەپ جاريالاعان بولاتىن. گۋايدونى اقش-پەن قوسا 50-دەن استام ەل قولدادى. ەندى وپپوزيتسيونەر ۇلتتىق اسسامبلەياعا قايتا سايلاناتىن بولسا، تىيىم سالۋ تۋرالى شەشىم زاڭدى كۇشىنە ەنەدى.

گۋايدونىڭ ءوزى بۇل شەشىمگە مويىنسۇنبايتىندىعىن ايتتى. «Univision» تەلەارناسىنا سۇحبات بەرگەن گۋايدو: «مادۋرو بيلىكتەن كەتىپ، زاڭعا باعىنعان جاعدايدا امنيستيا جاريالاۋعا دايىنمىن. ەگەر ول بەرىلمەيتىن بولسا، ەلدەگى جاعداي تىپتەن قيىنداي تۇسەدى. حالىق مەملەكەتتى ديكتاتوردىڭ باسقارۋىنا قارسى»، – دەدى.

23 قاڭتاردا ءوزىن ۋاقىتشا ۇكىمەت پرەزيدەنتى دەپ جاريالاعان گۋايدونى ليگيتيمدى مەملەكەت باسشىسى رەتىندە اقش، كانادا، برازيليا، چيلي، ارگەنتينا، كولۋمبيا، كوستا-ريكا، گۆاتەمالا، گوندۋراس، پاناما، پاراگۆاي جانە پەرۋ ەلدەرى مويىندادى. وسىعان دەيىن اقش «ديكتاتور باسقارۋشى» اتانعان نيكولاس مادۋروعا قارسى سانكتسيالار جاريالاپ، مەملەكەت باسشىسى اۆتوريتارلىق ديكتاتۋراعا ۇمتىلۋدان باس تارتپايىنشا، امەريكانىڭ ەكونوميكالىق جانە ديپلوماتيالىق كۇشتەرىن تۇگەل ۆەنەسۋەلا حالقىنىڭ دەموكراتيا ورناتۋ جولىنداعى كۇرەسىنە كومەككە ارنايتىنىن حابارلاعان بولاتىن. دونالد ترامپتىڭ قاجەت بولعان جاعدايدا ۆەنەسۋەلاعا اسكەري ينتەرۆەنتسيا جاسايتىنى تۋرالى مالىمدەمەسىنىڭ سالدارىن جويۋعا نيەتتەنگەن مايك پەنس لاتىن امەريكاسى ەلدەرىنە ساپارى بارىسىندا كاراكاسقا ەكونوميكالىق قىسىم ارقىلى دا اسەر ەتۋگە بولاتىنىن ايتقان. ال قىتاي مەن رەسەي تاراپى قازىرگى باسشى نيكولاس مادۋرو ۇكىمەتىنە سەنىم ءبىلدىرىپ، بيلىككە وزگە مەملەكەتتەردىڭ ارالاسۋىن «حالىقارالىق قۇقىقبۇزۋشىلىق» دەپ اتادى.

"The Qazaq Times"