فوتو: https://egemen.kz

«جاستار جىلىنا» قوسىمشا 25 ملرد تەڭگەگە جۋىق قاراجات بولىنبەك. بۇل تۋرالى قر پرەمەر-ءمينيسترىنىڭ ورىنباسارى گۇلشارا ابدىقالىقوۆا ۇكىمەت وتىرىسىندا مالىمدەدى.

گ.ابدىقالىقوۆا ءوز سوزىندە بولىنگەن قارجىنىڭ بۇگىندە باستى ماسەلەگە اينالعان جۇمىسپەن قامتاماسىز ەتۋ، ءبىلىم سالاسىنداعى كەمشىلىكتەرگە ءمان بەرۋ جانە جاستار پراكتيكاسىنا قاراستى جۇمسالاتىندىعىن ايتىپ سەندىردى. سونىمەن قاتار، جاڭا كاسىپ باستاۋ ءۇشىن گرانتتار دا قاراستىرىلماق. ابدىقالىقوۆا اتالعان ماسەلەلەر تەك الەۋمەتتىك مينيسترلىككە ەمەس، بارلىق مينيسترلىككە قاتىستى بولعاندىقتان، «بىرلەسە كۇش بىرىكتىرۋ» كەرەكتىگىن ايتىپ ءوتتى.

ۇكىمەت «جاستار جىلىنا» ارنالعان ءىس-شارالاردى ۇيىمداستىرۋ ءۇشىن بيۋدجەتتەن 100 ملرد تەڭگە ءبولۋدى جوسپارلاعان. ەندى اتالعان سوماعا 25 ملرد تەڭگە قوسىلادى. وسى رەتتە ەلدەگى الەۋمەتتىك ماسەلەلەردىڭ ەتەكتەن تارتىپ تۇرعاندىعىن ايتا وتكەن ءجون بولار. Ranking.kz ساراپتاما ورتالىعىنىڭ ستاتيستيكاسى بويىنشا، قازاقستاندا باسپاناسىز جۇرگەن ازاماتتاردىڭ سانى 2,5 ميلليون ادامدى قۇراعان. بۇل شامامەن ەل حالقىنىڭ 14 پايىزى. 2016 جىلعى ستاتيستيكا بويىنشا، قازاقستاندا 140 840 نەكە قيىلعان. ونىڭ ىشىندە 51 775 وتباسى اجىراسقان. الەۋمەتتانۋشى مامانداردىڭ پىكىرىنشە، جاس وتباسىلاردىڭ اجىراسۋىنىڭ باستى سەبەپتەرىنىڭ ءبىرى تۇرعىن ءۇي ماسەلەسى، جۇمىسسىزدىق جانە الەۋمەتتىك جاعدايدىڭ تومەندىگى. ال بيلىكتە جاقىندا ورىن العان جاڭالىقتار مەن استانا اتاۋىنىڭ وزگەرۋىنە «باس قاتىرعان» ۇكىمەتكە قاراپ، بيىلعى «جاستار جىلىنىڭ» قانشالىقتى وڭ ناتيجە بەرەتىنىن ءدال قازىر ءدوپ باسىپ ايتۋ قيىن.

"The Qazaq Times"