سۋ تاسقىنىنان زارداپ شەككەندەر سانى ميلليوننان استى. فوتو: Lifeline Energy.

موزامبيكتىڭ ورتا قورعاۋ مينيسترلىگى بەرگەن مالىمەتكە قاراعاندا ەلدەگى تابيعي اپاتتان قازا بولعاندار سانى 447 ادامعا جەتكەن. قازىر بۇل ەلگە حالىقارالىق گۋمانيتارلىق كومەكتەر جونەلتىلۋدە.

ەل ۇكىمەتىنىڭ تاراتقان مالىمەتىنە قاراعاندا قازا بولعانداردان تىس، جۇزدەگەن ادام جاراقات الىپ، وننان استام ادام جوعالعان. 128 مىڭ ادام باس پاناسىنان ايىرىلىپ، ۇكىمەتتىڭ ۋاقىتتىق شاتىرلارىندا پانالاۋدا. ال، وسىدان بىرەر اپتا بۇرىنعى بوران مەن سەل اپاتىنان ميلليونعا جۋىق ادام زارداپ شەككەن.

ەل بيلىگى 3 كۇن قاتارىنان ازا تۇتۋ كۇنى ەتىپ جاريالادى. سونداي-اق، ەلدەگى تابيعي اپاتتىڭ سالدارىن جويۋ جانە زارداپ شەككەن تۇرعىندارعا الەم ەلدەرىنەن كومەك سۇراۋدا. ەو، اقش، تۇركيا قاتارلى ەلدەر العاشقىلاردىڭ ءبىرى بولىپ موزامبيكتەگى اپات ايماعىنا گۋمانيتارلىق كومەك جونەلتتى.

“The Qazaq Times”