فوتو: https://jpgazeta.ru

اقش پرەزيدەنت دونالد ترامپ كونگرەستىڭ ەلدە توتەنشە جاعدايدى توقتاتۋ تۋرالى شەشىمىنە ۆەتو قويدى. بۇل تۋرالى Reuters اگەنتتىگى حابارلادى.

اقش-تىڭ مەكسيكامەن شەكارا اراسىنداعى جاعداي ورتالىق امەريكاسىنان بىرنەشە ميگرانت كەرۋەنىنىڭ شىعۋىنا بايلانىستى، بىلتىر قازاننان بەرى شيەلەنىسە تۇسكەن. ءوز ەلدەرىندە اشتىق-پەن زورلىق-زومبىلىقتان قاشقان ادامداردىڭ ءبارى اقش-قا ءوتۋدى قالايدى. بىراق، اق ءۇي باسشىسى ترامپ زاڭسىز ميگراتسيانىڭ ارتۋى ەلدىڭ قاۋىپسىزدىگىنە نۇقسان كەلتىرەدى دەپ، ولاردىڭ ەلگە كىرۋىنە قارسىلىق بلدىرگەن.

ترامپ وسىعان دەيىن 8 قاڭتاردا حالىققا جولداۋ جاساپ، مەكسيكامەن اراداعى شەكارا ماسەلەسىنە قاتىستى 5,7 ملرد دوللارعا جۋىق قارجى ءبولۋ كەرەكتىگىن ايقان بولاتىن. بىراق، كونگرەستەگى دەموكراتتار پرەزيدەنتتىڭ بۇل ۇسىنىسىن قابىلداۋدان باس تارتىپ، بيىلعى بيۋدجەت كولەمى انىقتالعان جوق. بەكىتىلمەگەن بيۋدجەت سالدارىنان 22 جەلتوقساننان بەرى اقش فەدەرالدى بيلىگىنىڭ جۇمىسى ءىشىنارا توقتاتىلعان بولاتىن. بۇل ماسەلەگە قاتىستى دونالد ترامپتىڭ ءوزى: «ۇكىمەتتىڭ تولىعىمەن قاشان جۇمىسقا كىرىسەتىندىگىن ايتا المايمىن. شەكارادا قاقپا تۇرعىزىلمايىنشا «شاتداۋن» جالعاسا بەرەدى. بۇل قابىرعا ەلگە زاڭسىز كىرگىسى كەلەتىندەرگە توسقاۋىل بولادى. جاھاندىق كەسەلگە اينالعان ادام ساۋداسى مەن ەسىرتكى تاسىمالىنا نۇكتە قويادى. قازىرگى ۋاقىتتا ءبىز ادام ساۋدالاۋشىلاردى قولعا ءتۇسىرۋ ءۇشىن جۇمىس ىستەپ جاتىرمىز. ال مەكسيكامەن اراداعى شەكاراعا قاقپا سالىنبايىنشا، وسى اتالعان كەسەلدەرمەن كۇرەسۋ قيىنعا سوعادى»،– دەپ مالىمدەدى.

ەكى ەل اراسىنداعى شەكاراداعى احۋالعا بايلانىستى امەريكادا بىرنەشە ۋاقىت شاتداۋن بولىپ، ەلدە توتەنشە جاعداي ەنگىزىلگەن بولاتىن. سەبەبى ترامپ ونى جاريالاۋ ارقىلى شەكاراعا قورعان سالۋعا قاجەتتى قارجى الۋدى كوزدەپ وتىر. ەلدىڭ باس پروكۋرورى اق ءۇي باسشىسىنىڭ ارەكەتى زاڭدى ەكەندىگىن ايتتى.

"The Qazaq Times"