ۆەنەسۋەلا وپپوزيتسياسىنىڭ جەتەكشىسى حۋان گۋايدو ءوز جاقتاستارىن 8 ناۋرىز كۇنى شەرۋگە شىعۋعا شاقىرعان بولاتىن. پرەزيدەنت مادۋرو بۇعان قارسى ءوز جاقتاستارىن 9 ناۋرىزعا شەرۋگە شىعۋعا شاقىردى. ءارى بۇل شەرۋدى ەلدىڭ بۇرىنعى باسشىسى چاۆەزدىڭ قايتىس بولۋىن ەسكە الۋعا ارناعان.

پرەزيدەنت نيكولاس مادۋرو مالىمدەمەسىندە اقش-تىڭ بۇرىنعى پرەزيدەنتى باراك وبامانىڭ دا 9 ناۋرىز كۇنى ۆەنەسۋەلانى اقش-تىڭ ۇتتىق قاۋىپسىزدىگىنە باستى قاۋىپ ءتوندىرۋشى ەل رەتىندە جاريالاعانىن دا ءسوز ەتكەن. مادۋرو سونداي-اق، 8 ناۋرىز حالىقارالىق ايەلدەر مەرەكەسىنە وراي ۆەنەسۋەلا ايەلدەرىن شەرۋگە شىعۋعا شاقىرعان جانە سول كۇنى ماڭىزدى مالىمدەمەلەر جاسايتىنىن ايتقان.

وسىدان بۇرىن وپپوزيتسيا جەتەكشىسى حۋان گۋايدو ورتالىق قالا كاراكاستا ەلدەگى كاسىپوداق وكىلدەرىمەن كەزدەسۋ وتكىزىپ، اسا اۋقىمدى شەرۋ ۇيىمداستىراتىنىن مالىمدەگەن ەدى. ونىڭ رەسمي مالىمدەمەسىندە شەرۋ ۇيىمداستىرۋدى كاسىپوداق جەتەكشىلەرى ۇسىنىس ەتكەن.

ۆەنەسۋەلاداعى حالىقتىق ەرەۋىلدەر سول ەلدەگى ازاماتتىق سوعىس قاۋپىن بارعان سايىن كۇشەيتۋدە. اقش باستاعان بىرقاتار باتىس جانە لاتىن امەريكالىق ەلدەردىڭ قولداۋىنا يە گۋايدو ءوزىن ۋاقىتشا ۇكىمەت باسشىسى رەتىندە جاريالاعاننان تارتىپ، ەلدەگى ساياسي داعدارىس شەگىنە جەتتى.

“The Qazaq Times”