ەۋروداق ۆەنەسۋەلاداعى جاعدايدى بەيبىت جولمەن شەشۋگە شاقىردى

ەۋروداق ۇيىمىنىڭ ىشكى ساياسي قىزمەتكەرى مايا كوسيانچيچ ۆەنەسۋەلاداعى جاعدايدى بەيبىت تۇردە شەشىپ، اسكەري ارالاسۋدان اۋلاق بولۋعا شاقىردى.

«ۆەنەسۋەلاداعى داعدارىس بەيبىت جانە دەموكراتيالىق جولمەن شەشىلۋى ءتيىس. سونىمەن قاتار زورلىق جاعدايلارعا دا جول بەرمەۋىمىز كەرەك. ال، مۇنداي وقيعاعا اسكەريلەردىڭ ارالاسۋعا مۇلدە قاقىسى جوق»، - دەگەن كوسيانچيچ لاتىن امەريكاسىنداعى قيىن جاعداي تۋرالى ءوز پىكىرىن ءبىلدىردى.

ۆەنەسۋەلا ۇلتتىق اسسامبلەيا باسشىسى حۋان گۋايدو ءبىراز ۋاقىت بۇرىن ءوزىن ۋاقىتشا پرەزيدەنت رەتىندە جاريالاپ، انت قابىلداعان بولاتىن. ۇكىمەتكە قارسى ميتينگ كەزىندە بولعان وقيعا كاراكاس تۇرعىندارىنىڭ الاڭعا شىعۋىنا اكەلىپ سوقتى. وسىدان كەيىن، ۆەنەسۋەلانىڭ قايتا سايلانعان پرەزيدەنتى نيكولاس مادۋرو بيلىكتى ءوز قولىندا ساقتاپ قالۋ ءۇشىن بارلىق شارالاردى قولدانىپ كەلەدى. ەڭ العاش گۋايدونى پرەزيدەنت رەتىندە مويىنداعان اقش پەن اراداعى بارلىق قارىم-قاتىناستى ءۇزىپ، ۆەنەسۋەلاداعى اقش وكىلدەرىن 72 ساعاتتا شەكارادان شىعۋىن تالاپ ەتكەن بولاتىن. سونداي-اق، وپپوزيتسيا جاقتاستارىنا جىبەرىلگەن گۋمانيتارلىق كومەكتەن باس تارتىپ، حالىقتىڭ ەشقانداي كەمشىلىك كورىپ وتىرماعاندىعىن مالىمدەدى.

قازىرگى تاڭدا حۋان گۋايدونى پرەزيدەنت رەتىندە اقش، كانادا، لاتىن امەريكاسىنىڭ بىرقاتار مەملەكەتتەرى، يزرايل، اۆستراليا سىندى مەملەكەتتەر قولداپ وتىر. ال، نيكولاس مادۋرونى زاڭدى پرەزيدەنت رەتىندە تانىعان رەسەي، يران، كۋبا، تۇركيا، ەكۆادور، بەلارۋسسيا، قىتاي سىندى مەملەكەتتەر ونىڭ ارى قاراي بيلىك باسىندا وتىرۋىن قالاپ وتىر.

ەستەرىڭىزگە سالا كەتەيىك، 2018 جىلدىڭ 20 مامىرىندا نيكولاس مادۋرو قايتادان التى جىلدىق پرەزيدەنت رەتىندە سايلانعان بولاتىن. 2019 جىلدىڭ 10 قاڭتارىنان باستاپ بيلىك باسىنا كەلۋى ءتيىس بولعان مادۋرونىڭ جولىنا بۇل جولى وپپوزيتسيا وكىلدەرى ءوز قارسىلىقتارىن ءبىلدىردى.

سوڭعى ۋاقىتتا بۇل جاعداي تىم شيەلەنە ءتۇستى. ەندى قايتا سايلاۋ وتكىزۋدى ۇسىنعان مادۋرو، گۋايدونى بۇل جولى دا جەڭىپ شىعاتىنىنا سەنىمدى ىسپەتتى. الايدا، حالىقتىڭ كوپتەگەن بولىگى بۇگىندە گۋايدونىڭ ۇستانعان ساياساتىن قولدايتىندىقتارىن كورسەتۋدە.

"The Qazaq Times"