يەمەن ءسىم ۆارشاۆاداعى كونفەرەنتسيادان كەيىن داۋعا قالدى

ۆارشاۆاداعى تاياۋ شىعىس تۋرالى حالىقارالىق كونفەرەنتسيا بارىسىندا يەمەن سىرتقى ىستەر ءمينيسترى حاليد ءال-يەمانيدى، يزرايل ۇكىمەت-ءمينيسترى بينيامين نەتانياحۋدىڭ جانىنا وتىرعانى ءۇشىن وتستاۆقاعا كەتۋىن تالاپ ەتۋدە.

قازىرگى تاڭدا يەمەننىڭ مىڭداعان تۇرعىندارى الەۋمەتتىك جەلى ارقىلى سىرتقى ىستەر ءمينيسترىنىڭ مۇنداي ارەكەتىنە وزدەرىنىڭ قارسىلىقتارىن ءبىلدىرىپ جۇمىستان بوساتىلۋىن سۇراپ وتىر.

يەمەندىكتەردىڭ ويىنشا، يزرايلمەن ەشقانداي ديپلوماتيالىق قارىم-قاتىناس جاساماعاندىقتان، سىرتقى ىستەر ءمينيسترى حالىق الدىندا كەشىرىم سۇراپ، ءوز ەركىمەن وتستاۆكاعا كەتۋى ءتيىس.

قونفەرەنتسيا بارىسىنداعى ءال-يەمانيدىڭ ارەكەتى يەمەندىك جۇرتشىلىقتىڭ ءتىپتى اشۋىنا تيگەن. يزرايل ۇكىمەت-ءمينيسترىنىڭ ميكروفونى ىستەن شىققانىنا بايلانىستى، يەمەن سىرتقى ىستەر ءمينيسترى ءوز ميكروفونىن ۇسىنعان. وسى كەزدە نەتانياحۋ «ەكى ەل سەرىكتەستىگى جولىنداعى العاشقى قادام» دەپ، ازىلدەپ ءتىل قاتقان.

ال، اقش-تىڭ حالىقارالىق كەلىسسوزدەر بويىنشا ارنايى باسشىسى جەيسون گرينبلاتت ءوزىنىڭ Twitter الەۋمەتتىك جەلىسىنە «جۇرەكتى قۋانتاتىن، ءبىر ءسات» دەپ جازدى.

سونداي-اق، وسى ورايدا يزرايل ۇكىمەت-ءمينيسترى دە Twitter الەۋمەتتىك جەلىسىنە «ءبىز تاريحتى جازىر وتىرمىز» دەپ، پىكىر بىلدىرگەن.

ال، مۇنداي تولاسسىز نارازىلىققا ءوز ويىن جەتكىزگەن ءال-يەماني: «يەمەن دەلەگاتسياسى ۆارشاۆادا الەمدىك كوشباسشىلارمەن كەزدەستى. بۇۇ-نىڭ اياسىندا مۇنداي جاعدايلار اركەز بولىپ تۇرادى. ال، يەمەننىڭ جاعدايىنا كەلەر بولساق، ءبىزدى ەشكىمنىڭ توقتاتۋعا قاقىسى جوق» دەپ جالپىلاما پىكىر بەردى.

سول سەكىلدى، الەۋمەتتىك جەلىدە جاپپاي نارازىلىققا كوشكەن يەمەندىك تۇرعىندار 2009 جىلى داۆوستا وتكەن حالىقارالىق ەكونوميكالىق فورۋم اياسىندا يزرايل پرەزيدەنتى شيمون پەرەستىڭ سوزىنەن كەيىن،  رەجەپ تايىپ ەردوعاننىڭ زالدان شىعىپ كەتكەندىگىن مىسالعا كەلتىرىپ، ۇلگى الۋىن جارىسا جازۋدا. بۇدان بولەك،  باسقا ورىندى يەمدەنۋگە دە قاقىسى بار بولعاندىعىن ايتىپ وتىر.

“The Qazaq Times”