قىرعىزستان مىندەتتى مەديتسينالىق ساقتاندىرۋ قورىنىڭ باسشىسى مارات قاليەۆ ۇكىمەتتىڭ جاساعان سىنىنان ءۇش كۇننەن كەيىن ءوز ەركىمەن وتستاۆكاعا كەتۋگە ءوتىنىش بەرگەن. بۇل تۋرالى KaktusMedia حابارلاپ وتىر.

قازىرگى تاڭدا قور باسشىسىنىڭ مۇنداي شەشىمگە كەلۋىنە قانداي سەبەپ بولعانى انىقتالماعان. ونىڭ ۇستىنە ءوزى دە باسقا شارۋالارمەن اينالىسامىن دەپ باسىن اۋلاققا سالعانعا ۇقسايدى.

نەگە؟ دەسەڭىزدەر، 15 اقپان كۇنى قىرعىز ۇكىمەتىنىڭ جيىنىندا تەك قاليەۆ قانا سىننىڭ استىندا قالعان جوق. سونىمەن بىرگە بىرنەشە شەنەۋنىككە دە تاياقتىڭ ءبىر ۇشى تيگەندىگى راس. مىسالعا الار بولساق، قىرعىزستاننىڭ دەنساۋلىق ساقتاۋ ءمينيسترى قوسموسبەك شولپانباەۆ، مەملەكەتتىك ميگراتسيا قىزمەتىنىڭ باسشىسى بولاتبەك يبرايمجانوۆ، ءبىلىم ءمينيسترى گۇلميرا قۇدايبەرديەۆا مەن قاتار تاعىدا بىرنەشە شەنەۋنىك قاتاڭ سىنعا ۇشىراعان بولاتىن.

اتالعان جيىن بارىسىندا قىرعىزستاننىڭ دەنساۋلىق ساقتاۋ ءمينيسترى شولپانباەۆ پەن قور باسشىسى قاليەۆ گرانت قارجىسىنا قىمبات جول تالعامايتىن كولىكتەر ساتىپ العاندىعى ءۇشىن سىننىڭ استىنا قالعان. قىرعىز جۋرناليستەرى انىقتاعانداي، اتالعان قۇزىرلى ورىنداردىڭ باسشىلارى ساتىپ الىنعان كولىكتەردى قىزمەتتىك اتوكولىك رەتىندە پايدالانىپ كەلگەن. الايدا، قىمبات كولىككە مىنگەن شولپانباەۆ قىرعىزستانداعى جەدەل جاردەم كولىگىنىڭ جەتىسپەۋىنە باس قاتىرماعان سىڭايلى.

 “The Qazaq Times”