اشراف عاني: تالىپتەرمەن كەلىسىمگە كەلۋگە دايىنمىن

اۋعانستان پرەزيدەنتى اشراف عاني ءبىر كۇن بۇرىن جاساعان مالىمدەمەسىندە، اۋعانستانداعى تالىپتەرمەن كەلىسسوز جۇرگىزۋدى قابىلدايتىنىن ايتتى. ول بۇل مالىمدەمەسىن تالىپتەر باقىلاۋىندا تۇرعان نانگارحار پروۆينتسياسىنا جاساعان ساپارى كەزىندە جاساعان.

«رەيتەر» اگەنتتىگىنىڭ حابارىنا قاراعاندا، پرەزيدەنت عاني تۇراقتى جانە ماڭگىلىك بەيبىتشىلىكتىڭ ورناۋىن قالايدى. «ەگەر تاليبان تارابى قابىلدايتىن بولسا، كۇنى ەرتەڭ-اق، كابۋلدا، كانداحاردا نەمەسە نانگارحاردا كەلىسسوز جۇرگىزۋگە بولادى»، – دەيدى اشراف عاني.

دەگەنمەن، تالىپتەر پرەزيدەنت عانيدىڭ سوزدەرىنە سەنە بەرمەيتىنىن ءبىلدىردى. تاليبان ۇيىمىنىڭ كاتاردىڭ دوحا قالاسىندا جۇمىس كەڭسەسى بار ەكەنى بەلگىلى. تالىپتەر وسى ارقىلى وزگە ەلدەرمەن كەلىسسوز جانە وزگە دە بايلانىستاردى جۇرگىزىپ وتىر. تاليباننىڭ وكىلى «رەيتەر» اگەنتتىگىنە بەرگەن جاۋابىندا: «ءبىز دوحاداعى وسى جۇمىس كەڭسەسىنىڭ حالىقارالىق ۇيىمدار مەن بۇۇ جاعىنان مويىندالۋىن قالايمىز. ال، عاني بولسا تاليباننىڭ رەسمي مويىندالۋى مەن بەيبىتشىلىك ورناتۋ پروتسەسىنە قارسى»، – دەگەن.

تالىپتەر جاقىندا دوحا قالاسىندا قۇراما شتات وكىلدەرىمەن بىرنەشە راۋند كەلىسسوز وتكىزگەنىمەن، اۋعانستان ۇكىمەتىمەن كەلىسسوز جۇرگىزۋدەن باس تارتقان.

اقش-تىڭ اۋعانستانداعى تۇراقتى وكىلى 8 اقپاندا جاساعان مالىمدەمەسىندە، شىلدەدە بولاتىن اۋعانستانداعى پرەزيدەنت سايلاۋىنا دەيىن جەرگىلىكتى ۇكىمەت پەن تالىپتەر اراسىندا كەلىسسوز تابىسقا جەتەدى دەپ ۇمىتتەنەتىنىن، ءارى سوعان كۇش سالاتىنىن ايتقان.

عاني بولسا، اقش-تىڭ ءبىر عانا تالىپتەرمەن كەلىسسوز وتكىزۋىنە قارسى ەكەنىن، اۋعانستان بولاشاعى تۋرالى شەشىمدە اۋعان حالقىنىڭ شەشىم جاساۋ قۇقىعىنىڭ بار ەكەنىن ەسكەرتكەن.

“The Qazaq Times”