قىتايدىڭ بەلگياداعى ەلشىسى قىتايلىق تىڭشىلار تۋرالى مالىمدەمە جاسادى

جاقىندا باتىس اقپارات قۇرالدارى بەلگيانىڭ ورتالىق قالاسى بريۋسسەلدە قىتايدىڭ 250-گە جۋىق تىڭشىسىنىڭ جۇرگەنىن حابارلاعان. بۇل حابار باتىس اقپارات قۇرالدارىنا تاراعاننان كەيىن بەلگيا جانە ەو-عا مۇشە ەلدەردىڭ الاڭداۋشىلىعىن تۋدىردى. ال، قىتايدىڭ بەلگياداعى باس ەلشىسى بۇل تۋرالى ارنايى مالىمدەمە جاسادى.

قىتايدىڭ بەلگياداعى باس ەلشىسى تساۋ جوڭميڭ 10 اقپاندا جاساعان مالىمدەمەسىندە قىتاي تىڭشىلارى تۋرالى حاباردى تەرىسكە شىعارىپ، «نەگىزسىز جانە بۇتىندەي ويدان قۇراستىرىلعان اڭگىمە» دەپ باعالاعان. ول سوزىندە: «قىتاي بەلگيانى قامتىعان بارلىق ەلدەرمەن دوستىق قارىم-قاتىناستى دامىتۋعا كۇش سالىپ كەلەدى. كەيبىر كۇشتەر قىتاي ۇكىمەتىن قارالاۋ ماقساتىندا بوتەن نيەتپەن وسىنداي حابارلاردى تاراتىپ وتىر»، – دەگەن.

قىتاي ەلشىسىنىڭ ايتۋىنشا «كەيبىر كۇشتەر» قىتاي مەن ەو-نىڭ قارىم-قاتىناسىنا كەرى اسەر ەتۋگە تىرىسقان. الايدا، تساۋ جوڭميڭ بۇل تۋرالى باتىستىق جۋرناليستەردىڭ سۇراقتارىنا جاۋاپ بەرۋدەن باس تارتقان.

قازىرگى كەزدە بىرقاتار باتىس ەلدەرى قىتايدىڭ تەحنولوگيا كومپانيالارىن تىڭشىلىقپەن اينالىسادى دەگەن كۇدىكپەن تەكسەرۋگە العان. ايتالىق، ۇلىبريتانيا قىتايلىق Huawei كومپانياسىنىڭ جابدىقتارى بريتانيانىڭ تەلەكوممۋنيكاتسيا قاۋىپسىزدىگىنە قاتەر توندىرەدى دەپ قارايدى.

“The Qazaq Times”