تىڭشىلىقپەن ايىپتالعان قىتايلىق ازاماتتار: اۋعانستان بەيجىڭ قىسىمىنا ۇشىرادى ما؟

اۋعانستاننىڭ ۇلتتىق قاۋىپسىزدىك اگەنتتىگى تىڭشىلىق جاسادى دەپ كۇدىكپەن كەمىندە 10 قىتاي ازاماتىن ەلدەن شىعارعانىن مالىمدەگەن. بىراق، بۇل تۋرالى قىتاي ءسىم تارابى «حابارىمىز جوق» دەگەن مالىمدەمە جاساپتى.

اۋعانستان ۇلتتىق قاۋىپسىزدىك اگەنتتىگىنىڭ جەتەكشىسى احمەد زيا ساراج وتكەن ايدا قىتايدىڭ تىڭشىلار جەلىسىن اشقانىن راستادى. دەگەنمەن، بۇل ماسەلە اسا سەزىمتال تاقىرىپ بولعاندىقتان ساراج تولىق مالىمەت بەرە المايتىنىن بىلدىرگەن.

Hindustan Times باسىلىمى ەكى كۇن بۇرىن حابارىندا، اۋعانستان تارابى قىتاي ازاماتتارىن العاش رەت تىڭشىلىق ايىبىمەن تۇتقىنداعانىن باسا بەلگىلەدى. اتالعان باسىلىم كەمىندە 10 قىتايلىق ازاماتتىڭ بەيجىڭنىڭ بارلاۋ ورگانىمەن بايلانىستى ەكەنىن، ال ونىڭ ەكەۋى «تاليبان» تەرروريستىك ۇيىمىنىڭ فيليالى – حاككاني قۇرامىندا بولىپ كەلگەنى تۋرالى مالىمەتتەردى كورسەتتى. اتالعان ۇيىم تالىپتەردىڭ اۋعانستانداعى نەگىزگى كۇشتەرىنىڭ ءبىرى سانالادى.

Hindustan Times سونداياق، بۇل قىتايلىق ازاماتتار وتكەن ايدا كابۋلدا تۇتقىندالعانىن، كەيىن كەشىرىم بەرىلىپ، ەلدەن شىعارىلعانىن جازعان. باسىلىم ولاردىڭ قىتايعا قايتارىلۋى بەيجىڭنىڭ قىسىمىنىڭ ناتيجەسى دەپ كورسەتكەن ەكەن، سەبەبى، ولار قىتاي جىبەرگەن ارنايى ۇشاقپەن قايتارىلعان.

دەگەنمەن، جۋرناليستەر سارسەنبى كۇنى قىتاي سىرتقى ىستەر مينيسترلىگى وتكىزگەن بريفينگتە قىتاي ءسىم وكىلى حۋا چۋنيىڭنان وسى ماسەلە تۋرالى سۇراعاندا ول: «بۇل تۇسىنىكسىز جاعداي، بۇدان حابارىمىز جوق» دەگەن جاۋاپ قايتارعان. ول جانە قىتاي-اۋعانستان اراسىنداعى بايلانىستار قاشاندا بەيبىت جانە دوستىق قارىم-قاتىناسقا قۇرىلعان دەپ كورسەتكەن.

سۇيتسە دە، اۋعان بيلىگىنىڭ اتى-ءجونىن كورسەتكىسى كەلمەگەن ءبىر لاۋازىمدىسى «رەيتەر» اگەنتتىگىنە بەرگەن جاۋابىندا، تەرگەۋ-تەكسەرۋ قۇجاتتارى اتالعان قىتايلىق كۇدىكتىلەردىڭ تالىپتەرگە دەلدال بولىپ جۇرگەن پاكىستاندىق ازاماتپەن تىعىز بايلانىستا بولعانىن ايقىن دالەلدەيتىنىن ايتقان. ال، تالىپتەر كابۋل مەن يسلامابادتا اقش قولداۋىنداعى اۋعاننىڭ رەسمي بيلىگىنە قارسى كۇرەسكەنى بەلگىلى.

«تاليبان» تارابى قىتاي ازاماتتارىنىڭ تىڭشىلىعى جانە تالىپتەرمەن بايلانىسى تۋرالى مالىمەتتەردى جوققا شىعاردى. پاكىستان مەن اۋعانستان پرەزيدەنتتەرى دە بۇل تۋرالى پىكىر بىلدىرگەن جوق. تەك، اۋعان پرەزيدەنتى اشراف عاني قىتاي تارابىنان كەشىرىم سۇراپ مالىمدەمە جاساپتى. ال، قىتاي جىبەرگەن ارنايى وكىل بەيجىڭ تارابى بۇل ازاماتتاردىڭ نە ىسپەن اينالىسىپ جۇرگەنىن انىق بىلمەيتىنىن، دەپارتاتسيالانعاننان كەيىن ءتيىستى ورگاندار ءجىتى تەرگەۋ جۇرگىزەتىنىن ايتقان.

ال، «رەيتەرگە» مالىمەت بەرگەن اۋعانستاندىق ءۇش لاۋازىمدى تۇلعا، اۋعانستان تارابى قىتايلىق ازاماتتاردى تۇتقىنداعاننان كەيىن، بەيجىڭ تارابى ارنايى وكىل جىبەرىپ ولاردى بوساتۋدى تالاپ ەتكەنىن ايتقان. ولار سونداي-اق، تىڭشىلىق كۇدىككە ىلىنگەن قىتايلىق 13 ازامات اراسىندا قاراپايىم قۇرلىسشى، ناۋبايشى، اعاش ۇستالارى دا بولعانىن راستاعان.

ۇندىستاندىق باسىلىم اۋعان ۇكىمەتى بەيجىڭ قىسىمىنان كەيىن قىتايلىق كۇدىكتى ازاماتتاردى بوساتۋعا ءماجبۇر بولعانىن كورسەتەدى. دەگەنمەن، ەكى تاراپتىڭ وزگە دە قۇپيا كەلىسىمدەرگە كەلۋ ىقتيمالدىعى دا بار.

“The Qazaq Times”