اقش پرەزيدەنتى دونالد ترامپ دايش-كە قارسى كواليتسياعا مۇشە ەلدەردىڭ ءسىم باسشىلارى باس قوسقان جينالىستا مالىمدەمە جاساپ، تەررورلىق ۇيىمعا قارسى كۇرەستەگى حالىقارالىق كواليتسيانىڭ تابىسى تۋرالى ايتتى. ول ءوزى مىندەتكە وتىرعاننان بەرى اق ءۇيدىڭ دايش-كە قارسى كۇرەسكە باسا نازار اۋدارعانىن العا تارتقان.

ترامپ سوزىندە پرەزيدەنت بولىپ تاعايىندالا سالىسىمەن پەنتاگونعا بەرگەن العاشقى مىندەتى دايش-كە قارسى كۇرەستىڭ جوباسىن جاساپ شىعارۋ ەكەنىن ايتقان. سونداي-اق، بۇعان دەيىن اتالعان تەررورلىق توپتىڭ ۇگىت-ناسيحات جولدارى بولىپ كەلگەن عالامتورداعى ارنالارىن بۇعاتتاعانىن ايتتى.

«مەن دايش-تىڭ تولىق جەڭىلىسكە ۇشىراعانىن ەستىگىم كەلەدى. بىراق، رەسمي مالىمەتتى كۇتىپ وتىرمىن. الداعى اپتادا ءبىز ءسۇريا جەرىندەگى دايش تەررورلىق توبىنىڭ تولىقتاي جەڭىلىسكە ۇشىراعانىن جاريالاي الامىز»، – دەدى.

ترامپ سوزىندە حالىقارالىق كواليتسياعا مۇشە ەلدەرگە العىس ايتقان. ولاردىڭ قاتىسۋىمەن ءسۇريا مەن يراك جەرىندە تەررورلىق ۇيىمنىڭ 70-كە جۋىق جوعارى لاۋازىمدى ادامىن جويعانىن جەتكىزگەن.

“The Qazaq Times”