АҚШ президенті Дональд Трамп ДАИШ-ке қарсы коалицияға мүше елдердің СІМ басшылары бас қосқан жиналыста мәлімдеме жасап, террорлық ұйымға қарсы күрестегі халықаралық коалицияның табысы туралы айтты. Ол өзі міндетке отырғаннан бері Ақ үйдің ДАИШ-ке қарсы күреске баса назар аударғанын алға тартқан.

Трамп сөзінде президент болып тағайындала салысымен Пентагонға берген алғашқы міндеті ДАИШ-ке қарсы күрестің жобасын жасап шығару екенін айтқан. Сондай-ақ, бұған дейін аталған террорлық топтың үгіт-насихат жолдары болып келген ғаламтордағы арналарын бұғаттағанын айтты.

«Мен ДАИШ-тың толық жеңіліске ұшырағанын естігім келеді. Бірақ, ресми мәліметті күтіп отырмын. Алдағы аптада біз Сүрия жеріндегі ДАИШ террорлық тобының толықтай жеңіліске ұшырағанын жариялай аламыз», – деді.

Трамп сөзінде халықаралық коалицияға мүше елдерге алғыс айтқан. Олардың қатысуымен Сүрия мен Ирак жерінде террорлық ұйымның 70-ке жуық жоғары лауазымды адамын жойғанын жеткізген.

“The Qazaq Times”