ەو حۋان گۋايدونى ۆەنەسۋەلا پرەزيدەنتى رەتىندە جاريالادى

ەۋروپالىق وداق ۆەنەسۋەلا وپپوزيتسيالىق پارلامەنتىنىڭ كوشباسشىسى (ۇلتتىق اسسامبلەيا) حۋان گۋايدونى ەلدىڭ لەگيتيمدى باسشىسى رەتىندە جاريالاۋ تۋرالى رەسمي مالىمدەمە جاسادى.

Reuters اگەنتتىگىنىڭ حابارلاۋىنشا، وداق قۇرامىنداعى ون ەكى ەل گۋايدونى قولدايتىنىن ايتقان. ال يتاليا تاراپى قارسىلىق ءبىلدىرىپ وتىر. وسىعان دەيىن اقش پرەزيدەنتى دونالد ترامپ «ۆەنەسۋەلا حالقى نيكولاس مادۋرو رەجيمىنە باتىل قارسىلىق تانىتتى» دەپ، حۋان گۋايدوعا قولداۋ بىلدىرگەن بولاتىن. ترامپ ۇلتتىق اسسامبلەيانى ۆەنەسۋەلانىڭ «جالعىز لەگيتيمدى بيلىك ورگانى» دەپ تانيتىنىن ايتتى.

وتكەن اپتادا يسپانيا، گەرمانيا، ۇلىبريتانيا، فرانتسيا، نيدەرلاندى، پورتۋگاليا، اۆستريا ۇكىمەتتەرى مادۋرو سەگىز كۇننىڭ ىشىندە سايلاۋ داتاسىن انىقتاماسا، وپپوزيتسيا ليدەرى حۋان گۋايدونىڭ بيلىگىن مويىندايتىنىن مالىمدەدى. وسىعان دەيىن گۋايدونى لاتىن امەريكاسى ەلدەرىنىڭ باسىم بولىگى، اقش، كانادا  ۆەنەسۋەلانىڭ ۋاقىتشا باسشىسى دەپ تانىدى. ال، «ديكتاتور باسشى» رەتىندە تانىلعان نيكولاس مادۋرونى قىتاي، رەسەي، يران، تۇركيا، كۋبا قولداپ وتىر.

"The Qazaq Times"