240 شاقىرىم شەكاراعا تىكەن-تور قويىلماق. فوتو:BBC/AFP.

اقش-تىڭ قورعانىس مينيسترلىگى اقش-مەكسيكا شەكاراسىنىڭ وڭتۇستىك-باتىسىنا 3750 شەكارا قورعاۋشى اسكەر مەن سالىق قىزمەتكەرلەرىن قوسىمشا كۇش رەتىندە جىبەرمەك. بۇل تۋرالى پەنتاگون مالىمدەمەسىندە: «بۇل شەكارا قىزمەتكەرلەرىنىڭ سانىن 4350 ادامعا كوبەيتۋگە مۇمكىندىك بەرەدى»، – دەلىنگەن. دەمەك، اقش مەكسيكامەن شەكاراسىنداعى قىزمەتكەرلەر سانىن 6 ەسەگە دەيىن كوبەيتۋدى كوزدەپ وتىر.

مالىمدەمەدە ايتىلعانداي، شەكاراعا جىبەرىلەتىن قوسىمشا قىزمەتكەرلەر 90 كۇندىك مىندەتتى مەرزىممەن جىبەرىلمەك. سونداي-اق، 240 شاقىرىم اۋماققا تىكەن-تور تارتىلىپ، ءموبيلدى ىزدەستىرۋ جۇيەسى ورناتىلادى.

وتكەن اپتادا اقش قورعانىس كۇشتەرى مەكسيكا شەكاراسىنا 3500 شەكارا قورعاۋشى قارۋلى جاۋىنگەردى اتتاندىراتىنى تۋرالى حابارلار امەريكالىق باق-تا تاراعان ەدى. اپتا سوڭىندا ەل پرەزيدەنتى دونالد ترامپ بۇل ايتىلعانداردى راستادى. ترامپ بۇل شارانى ەلدەگى قاۋىپسىزدىكتى، زاڭسىز قونىس اۋدارۋشىلاردى توقتاتۋ ماقساتىندا شەكارا اسكەرىنىڭ سانىن كوبەيتىپ جاتقانىن ايتقان. سونىمەن بىرگە اقش پرەزيدەنتى قۇراما شتات تەرريتورياسىنا زاڭسىز كىرۋشىلەردى توقتاتۋعا كومەك بەرمەگەنى ءۇشىن مەكسيكا ۇكىمەتىن ايىپتاپ كەلەدى.

لاتىن امەريكا جانە باسقا دا الىس قۇرىلىقتاردان كەلەتىن ميگرانتتارعا قارسى كۇرەس اقش-تا ترامپ بيلىگىنەن بەرى قاتاڭ جۇرىلۋدە. كەيبىر ميگرانتتار ءوز ەلدەرىنە قايتارىلدى. ەندى بىرقاتارى اقش شەكاراسىن اتتاي الماي، مەكسيكا جەرىندە قالىپ قويدى. شەكارا اتتاعاندارى دا مەكسيكا شەكاراسىنان الىستاپ كەتە المادى. اقش تەرريتورياسىنا ىشكەرىلەي كىرۋىنە قاتاڭ شەكتەۋ قويىلىپ وتىر.

ترامپتىڭ ميگرانتتارعا قارسى شارالارىنا قارماستان زاڭسىز شەكارا اتتاۋشىلار لەگى ازاياتىن ءتۇرى جوق. وسى اپتا باستالا سالىسىمەن-اق، 2400 ادامنىڭ مەكسيكادان اقش شەكاراسىنا قاراي بەت العانى تۋرالى حابارلار تاراپ جاتتى.

“The Qazaq Times”