يتاليا پرەزيدەنتى جاڭا زاڭعا قول قويدى

يتاليا پرەزيدەنتى سەردجو ماتتارەللا ەلدەگى زەينەتكەرلىك جاسىن تومەندەتۋگە قاتىستى جاڭا زاڭعا قول قويدى. بۇل تۋرالى BBC اگەنتتىگى حابارلادى.

ەندى بيىلدان باستاپ وتىز سەگىز جىلدان استام ەڭبەك ءوتىلى بار قىزمەتكەرلەرگە زەينەتاقى «كۆوتا 100» باعدارلاماسى اياسىندا قاراستىرىلادى. ياعني 29 جاسقا تولماي قىزمەت ەتكەن ەرلەر مەن ايەلدەر 62 جاستا زەينەتكە شىعادى. بۇعان دەيىن زاڭ بويىنشا ەرلەر ءۇشىن 67, ال ايەلدەر ءۇشىن 66 جاس زەينەت جاسى رەتىندە بەلگىلەنگەن.

2011 جىلى يتاليادا ەكونوميكالىق داعدارىس ورىن الىپ، زەينەتكەرلىك جاسى 67-گە دەيىن ۇلعايتىلعان بولاتىن. سوڭعى جىلدارداعى يتالياداعى ساياسي داعدارىستىڭ ەڭ باستى سەبەبى، پارلامەنتتەگى باسىم ورىندى ەشبىر پارتيا نەمەسە اليانستىڭ جەڭىپ الماۋى دەپ سانايدى ساراپشىلار. بۇل يتاليا پارلامەنتىن قاۋقارسىزدىققا الىپ كەلىپ، سوڭىندا ۇزاق جىلعا سوزىلعان ساياسي داعدارىستار مەن ەكونوميكالىق قيىنشىلىقتارعا ۇشىراتتى. سالدارىنان ەۋروايماقتىڭ ءۇشىنشى ۇلكەن ەكونوميكالىق ايماعى اۋقىمدى ساياسي تۇراقسىزدىققا تاپ بولدى. بىلتىر وسى ماسەلەگە قاتىستى جيىن ءوتىپ، ەۋروكوميسسيا يتاليادان العاش رەت بيۋدجەت جوباسىن تولىقتىرۋدى تالاپ ەتتى. ريم الەۋمەتتىك باعدارلامالارعا قاتىستى بيۋدجەت كولەمىن 0,9%-عا ۇلعايتۋدى ۇسىنعانمەن، بريۋسسەل ونى كەرى قايتاردى. سەبەبى، ەكى تاراپ ۇسىنىسىنداعى ايىرماشىلىق 25 ميلليارد ەۋروعا جەتكەن.

قازىردىڭ وزىندە يتاليا جۇمىسسىزدىق يندەكسى بويىنشا ەو ەلدەرى اراسىندا ءۇشىنشى ورىندا. ەلدەگى قارجىلىق داعدارىستى جانە جۇمىسسىزدىق دەڭگەيىن قالىپقا كەلتىرۋ ءۇشىن پرەزيدەنت ماتتارەللو جاڭا رەفورما قابىلداناتىنىن مالىمدەدى. سونىمەن قاتار، شاكىرتاقى، زەينەتاقى جانە الەۋمەتتىك كومەككە بولىنەتىن قارجى ارتادى.

"The Qazaq Times"