اقش-تا مۇعالىمدەر ەرەۋىلگە شىقتى

اقش-تا مۇعالىمدەر ەرەۋىلگە شىقتى.

Reuters اگەنتتىگىنىڭ حابارلاۋىنشا، لوس-اندجەلەستەگى 900-گە جۋىق ورتا مەكتەپتەرىنەن بارلىعى 30 مىڭداي مۇعالىم ەكىنشى كۇن قاتارىنان ەرەۋىل ۇيىمداستىرعان. مۇعالىمدەردىڭ باستى تالابى – جالاقىنى ءوسىرۋ جانە ءار سىنىپتاعى وقۋشى سانىن ازايتۋ. كاليفورنياداعى مەكتەپتەردە ءبىر سىنىپتا قىرىققا جۋىق وقۋشى ساباققا قاتىسادى. ال ەرەۋىلگە شىققاندار سىنىپتا جيىرما وقۋشىدان اسپاعانى ابزال دەيدى. مالىمەتتەرگە سۇيەنسەك، قۇراما شتاتتارداعى ورتا مەكتەپ مۇعالىمدەرى ورتاشا ەسەپپەن العاندا 4800 دوللار كولەمىندە جالاقى الادى. ايلىق كولەمى شتات پەن مەكتەپتەردىڭ ستاتۋسىنا قاراي دا بەلگىلەنەدى. ماسەلەن، نيۋ-يورك، كاليفورنيا، لاس-ۆەگاستا 7500-8000 دوللار بولسا، وڭتۇستىك داكوتا، تەحاستا 3500 دوللارعا دەيىن قاراستىرىلعان. ازىرشە، اقش بيلىگى ءالىپتىڭ ارتىن باعىپ، بۇل ەرەۋىلگە قاتىستى پىكىر بىلدىرگەن جوق.

مۇعالىمدەر شەرۋى گرەكيادا دا ءوتىپ جاتىر. جالاقىنىڭ ازدىعىن تىلگە تيەك ەتكەن مۇعالىمدەر جەرگىلىكتى ءتارتىپ ساقشىلارىمەن قاقتىعىسقان. سول سەبەپتى پوليتسيا قىزمەتكەرلەرى كوز جاساۋراتاتىن گاز قولدانىپ، افينانىڭ سيەتاگما الاڭىنداعى ەرەۋىلشىلەردى توقتاتپاق بولعان. بىراق، جۇمىسشىلار ەرەۋىلى اۋا-رايىنىڭ قولايسىزدىعىنا قاراماستان كۇنى بويىنا جالعاستى.

"The Qazaq Times"