جاپونيا باق-ى قىتايلىق حاكەرلىك توپتىڭ كيبەرشابۋىل جاساعانىن ايىپتادى

جاپونيا كيبەرقاۋىپسىزدىك ساراپشىلارى قىتاي ۇكىمەتىمەن بايلانىستى ART10 حاكەرلىك ۇيىمى 2016 جىلى جاپونيانىڭ ءىرى كوممەرتسيالىق ۇيىمى جاپون ەكونوميكا قاۋىمداستىعىنا حاكەرلىك شابۋىل جاساعان دەپ كۇدىكتەنەدى.

جاپون باق-ى جەكسەنبىدە تاراتقان حابارلارىندا، كيبەرقاۋىپسىزدىك ماماندارى جاپونيا ەكونوميكا قاۋىمداستىعىنا جاسالعان شابۋىلداعى ۆيرۋستار مەن سەرۆەرلەر بۇعان دەيىن بەلگىلى بولعان ART10 حاكەرلىك ۇيىمى قولدانعان سەرۆەرلەر مەن ۆيرۋستارمەن بىردەي ەكەنىن ايتقان.

جاپونيا ەكونوميكا قاۋىمداستىعى ەلدەگى ەڭ ءىرى كومپانيالاردان، سالالىق قاۋىمداستىقتاردان جانە ەكونوميكالىق توپتاردان قۇرالعان. اتالعان ۇيىم ساياساتقا قاتىستى كەڭەستەر، قىزمەتكەرلەر تۋرالى اقپارات جانە كومپانيا مۇشەلەرى مەن باسقالار اراسىنداعى ەلەكتروندىق حاتتاردىڭ ۇرلانۋىنان الاڭداۋشىلىق بىلدىرگەن.

اقش ادىلەت دەپارتامەنتى بىلتىر 20 جەلتوقساندا مالىمدەمە جاساپ، قىتاي ۇكىمەتىمەن بايلانىستى «APT10» حاكەرلىك ۇيىمى سوڭعى بىرنەشە جىلدا كوپتەگەن ەلدەردىڭ كومپيۋتەرلىك جۇيەلەرىنە شابۋىل جاساپ، زياتكەرلىك مەنشىك پەن باسقا دا قۇپيا اقپاراتتى ۇرلادى دەپ ايىپتاعان بولاتىن. سونداي-اق، اتالعان حاكەرلىك توپ بريتانيا، كانادا، اۋستراليا، جاڭا زەلانديا جانە ت.ب. ەلدەردى نىساناعا العانىن ايتقان ەدى. بۇل رەت جاپونيا قۇراما شتاتتىڭ اتالعان مالىمدەمەسىن راستاعان.

بىراق، بەيجىڭ بيلىگى وسىعان دەيىن قانداي دا ءبىر حاكەرلىك توپقا قولداۋ كورسەتپەگەنىن جانە كيبەرشابۋىل ۇيىمداستىرماعانىن ايتقان. ءارى، اقش ادىلەت دەپارتامەنتىنىڭ مالىمدەمەسىن «دالەلدەنبەيتىن، نەگىزسىز جانە بىرجاقتى ايىپتاۋ» دەپ باعالاعان.

“The Qazaq Times”