«سەربيا، ويان!»: بيلىككە قارسى كەزەكتى شەرۋ

سەربيادا بيلىككە قارسى التىنشى شەرۋ ءوتتى.

وسىعان دەيىن بەلگرادتان باستالعان شەرۋ سەربيانىڭ بەس قالاسىندا جالعاستى. رەسمي پرەزيدەنت تاراپى دا، وزگە بيلىك وكىلدەرى دە شەرۋگە قاتىستى ناقتى مالىمدەمە بەرمەگەندىكتەن، حالىق نارازىلىعى كۇننەن-كۇنگە ارتىپ كەلەدى.

«سەربيا، ويان!» دەپ ۇرانداتقان جۇرت ۇكىمەتتەن كوسوۆومەن اراداعى كەلىسىم بويىنشا تولىق ماعلۇمات بەرۋدى جانە ەل پرەزيدەنتى الەكساندر ءۆۋچيچتىڭ بيلىكتەن كەتۋىن تالاپ ەتتى. بەلگرادتاعى جوعارى وقۋ ورىندارىنان جينالعان ستۋدەنتتەر ەلدە ازاماتتىق جانە داۋىس بەرۋ ەركىندىگىنىڭ جوقتىعىن ايتىپ، «ديكتاتور كەتسىن!»، «كلاندىق جۇيەگە جول جوق!» سىندى پلاكاتتار ۇستاپ شىققان. وپپوزيتسيا وكىلدەرى بيلىك كوسوۆومەن اراداعى ماسەلەدە ۇلتتىق مۇددەنى ساتىپ كەتتى دەيدى. ەگەر بيلىك حالىق مۇڭىنا قۇلاق اسپاسا، نارازىلىق شەرۋلەرى كۇللى سەربيادا جالعاسىن تاپپاق.

ايتا كەتەيىك، شەرۋدىڭ العاشقى كۇنى مىڭداعان تۇرعىن پرەزيدەنت رەزيدەنتسياسىنا جينالعان. بۇعان سەربيا پرەزيدەنتى الەكساندر ءۆۋچيچتىڭ وپپوزيتسيالىق توپتارعا قاتىستى ۇستانىمى مەن بيلىكتىڭ وپپوزيتسيونەرلەرگە قارسى باعىتتا بولۋى سەبەپ بولعان. وسىعان دەيىن سەربيا پرەزيدەنتى جەرگىلىكتى تەلەارنالارعا بەرگەن سۇحباتتارىنىڭ بىرىندە: «مەن جانە ءبىزدىڭ بيلىك ۇستانعان ساياساتقا 5 ميلليون ادام قارسىلىق بىلدىرسە دە ايتقانىمنان قايتپايمىن»، – دەپ مالىمدەگەن.

"The Qazaq Times"