ميانما سوتى Reuters تىلشىلەرىنىڭ اپەللياتسيالىق شاعىمىن قاراۋدان باس تارتتى

ميانما سوتى 7 جىلعا باس بوستاندىعىنان ايىرىلعان «Reuters» اگەنتتىگى جۋرناليستەرىنىڭ اپەللياتسيالىق ارىزىن قابىلداۋدان باس تارتتى.

سوتتىڭ پىكىرىنشە، جۋرناليستەردىڭ ادۆوكاتى ناقتى دالەلدەر ۇسىنباعان. سول سەبەپتى قوس ءتىلشىنىڭ ءىسى قايتا قارالمايدى. ەندى تىلشىلەر نەيپيدو قالاسىندا ورنالاسقان جوعارى سوتقا اپەليايتسيالىق شاعىم تۇسىرمەك.

بۇعان قاتىستى «Reuters» اگەنتتىگىنىڭ باس رەداكتورى ستيۆەن ادلەر: «سوتتىڭ شەشىمى سول ەل بيلىگىنىڭ قانداي ادىلەتسىز جانە ەركىندىگى جوق ەكەندىگىن كورسەتتى. بۇل قاۋلى كەزەكتى ادىلەتسىزدىكتىڭ ايقىن دالەلى. رەپورتاج جاساۋ ەشقاشان دا قىلمىس جاسادى دەگەندى بىلدىرمەيدى. ميانما بيلىگى شىندىق ىزدەگەن تىلشىلەردىڭ كوزىن جويعىسى كەلەدى»، – دەيدى. ال ميانماداعى ەو ەلشىسى كريستين شميدت: «ميانما سوتىنىڭ بۇل ارەكەتى دۇرىس ەمەس. اپەللياتسيانى قابىلداپ، جۋرناليستەردى بوساتۋ ارقىلى ءوز قاتەلىكتەرىن مويىنداۋى ءتيىس ەدى. ال بۇلار، كەرىسىنشە، ميانمادا ءسوز بوستاندىعى جوق ەكەنىن تاعى ءبىر مارتە دالەلدەدى».

ۆا لون مەن كيا – ميانماداعى روحيندجا مۇسىلماندارىنا قاتىستى زورلىق-زومبىلىقتى زەرتتەۋمەن اينالىسقان «Reutەrs» اگەنتتىگىنىڭ تىلشىلەرى. ولار راكحاين شتاتىنداعى جانتۇرشىگەرلىك جاعداي مەن روحيندجا مۇسىلماندارى كورگەن قورلىق تۋرالى ماتەريالدار جاريالاپ كەلگەن. سونداي-اق بيلىكتەگى ادىلەتسىزدىكتەردى اشىق ايتىپ، زەرتتەگەن. 2018 جىلى قىركۇيەكتە ميانما سوتى قوس تىلشىگە روحيندجا مۇسىلماندارى تۋرالى ماتەريالدارمەن جۇمىس ىستەۋ كەزىندە مەملەكەتتىك قۇپيا تۋرالى زاڭدى بۇزدى دەپ، 7 جىلعا باس بوستاندىعىنان ايىرۋ تۋرالى ۇكىم شىعاردى. جاقىندا امەريكالىق Time جۋرنالى قوس ءتىلشىنى «جىل ادامى» اتاعىنا لايىقتى دەپ تانىدى.

"The Qazaq Times"