لۋكاشەنكو: ماسكەۋ شارتتى ورىنداماسا، جاقىن وداقتاسىنان ايىرىلادى

ەگەر ماسكەۋ مينسكىگە ساتاتىن مۇناي باعاسىن ارزانداتپاسا، باتىس تاراپتاعى جالعىز وداقتاسىنان ايىرىلادى. بەلارۋس پرەزيدەنتى الەكساندر لۋكاشەنكو كرەملگە وسىنداي ەسكەرتۋ جاسادى.

بەلارۋس رەسەيدەن مۇناي ونىمدەرىن ساتىپ الىپ، ەكسپورتتاعان. ەندى رەسەي وزىنە قاۋىپ بولعان ەكونوميكالىق داعدارىستان ارىلۋ ءۇشىن، مۇناي باعاسىن وسىرمەك بولعان. لۋكاشەنكو جەرگىلىكتى اقپارات قۇرالدارىنا سۇحبات بەرىپ: «ەگەر دە ماسكەۋ قارا التىن باعاسىن قىمباتتاتسا، مينسك ءىرى كولەمدە وتەماقى تالاپ ەتەدى. قازىر رەسەيدىڭ جاقىن وداقتاسىنان ايىرىلۋ قاۋپى بار جانە وسىنى پايدالنىپ بەلارۋستى وزىنە قوسامىن دەپ ويلاماسىن»، – دەدى.

وسىعان دەيىن ەكى ەل پرەزيدەنتى ماسكەۋدە كەزدەسۋ وتكىزىپ، اتالعان ماسەلەلەردى تالقىلاعان بولاتىن. پۋتين ءوز سوزىندە رەسەي مەن بەلارۋس اراسىنداعى بايلانىستاردىڭ قارقىندى تۇردە دامىپ جاتقانىن جانە كەيبىر ماسەلەلەردىڭ شەشىلەتىنىن ايتقان. ال بەلارۋس پرەزيدەنتى لۋكاشەنكو گاز باعاسىنا قاتىستى كەلىسپەۋشىلىكتەردى تەز ارادا رەتتەۋ تۋرالى ۇسىنىس بىلدىرگەن. بىراق، ەكى ەل اراسىنداعى ەنەرگەتيكالىق بايلانىس ءالى كۇنگە دەيىن ۋشىعىپ تۇر.

"The Qazaq Times"