اقش پرەزيدەنتى دونالد ترامپ سول ەلدىڭ جەرگىلىكتى ۋاقىتىمەن سەيسەنبى كۇىن 21:00-دە، ارنايى مالىمدەمە جاساپ، «قاۋىپسىزدىك جانە گۋمانيتارلىق داعدارىستىڭ» الدىن الۋ ءۇشىن وڭتۇستىك شەكاراعا قورعان تۇرعىزۋدىڭ كەزەك كۇتتىرمەيتىنىن ايتتى. ونىڭ ايتۋىنشا،  كۇن سايىن مىڭداعان زاڭسىز قونىس اۋدارۋشىلار اقش-قا كىرۋگە ارەكەت ەتەتىنىن، ەلگە كىرەتىن ۋلى شەگىمدىكتىڭ (گەروين) 90 پايىزى وڭتۇستىك شەكارا ارقىلى كىرەتىنىن، بۇل ءار كۇنى 300 امەريكالىقتىڭ ءومىرىن جالمايدى.

ايتا كەتەرلىگى، ترامپتىڭ كەزەكتى مالىمدەمەسى ونىڭ مەكسيكاعا جاسايتىن رەسمي ساپارىنىڭ الدىندا جاسالىپ وتىر. ول سوزىندە: «ەلىمىزدىڭ وڭتۇستىك ايماقتارىندا گۋمانيتارلىق داعدارىس ءورشىپ بارادى»، – دەگەن.

ترامپ ارنايى تەلە مالىمدەمە جاسادى. فوتو: BBC.

اق ءۇي باسشىسىنىڭ سوزىنە قاراعاندا، مەكسيكا شەكاراسىنا قورعان تۇرعىزۋ، شەكارا اتتاعان قىلمىستار مەن كونتراباندالىق ارەكەتتەردىڭ الدىن الىپ، مىڭداعان ادامنىڭ ءومىرىن قورعاپ قالماق. ول جانە زاڭدى تۇردە شەكارا اتتاۋشىلاردى قۇراما شتاتتىڭ قۇشاعى اشىق ەكەنىن، الايدا زاڭسىز ميگرانتتار ەلدىڭ قاۋىپسىزدىگىنە قاتەر توندىرگەندىكتەن، شەكتەۋ قويۋعا تۋرا كەلەتىنىن ايتقان.

ترامپ ەل قاۋىپسىزدىگىنە تونگەن قاتەردىڭ الدىن الۋ ءۇشىن شەكارا ايماقتارىن قورعاۋ جوسپارىن كونگرەسكە ۇسىنعانىن ايتقان. ول ۇسىنعان جوباعا سايكەس مەكسيكا شەكاراسىنا قورعان تۇرعىزۋ ءۇشىن 507 ملرد دوللار قارجى ءبولۋ كەرەك.

سەنات شەكارا قورعانىن تۇرعىزۋعا قارجى بولۋگە قارسى بولىپ كەلە جاتقاندىقتان، اقش ۇكىمەتى 18 كۇننەن بەرى جارىم-جارتىلاي جۇمىس توقتاتتى دەۋگە بولادى. ال، سەناتتىڭ بيۋدجەت جوباسىندا شەكارا قورعانىنا قارجى ءبولۋ تۋرالى تارماعى جوق بولعاندىقتان پرەزيدەنت ترامپ وعان قول قويماعان. سوندىقتان دا اقش-تىڭ ۇكىمەت قىزمەتكەرلەرى دە جالاقىلارىن الا الماي وتىر.

ترامپتىڭ رەسمي مالىمدەمەسىنەن كەيىن كونگرەستىڭ وكىلدەرى پالاتاسىنداعى دەموكرات سپيكەرى نەنسي پەلوسي مەن سەناتتاعى دەموكراتتاردىڭ جەتەكشىسى چاك شۋمەر جاۋاپ قايتاردى. پەلوسي سوزىندە: «پرەزيدەنت ەلدى قورقىتىپ سويلەگەندى ۇناتادى. ءبىز ناقتى فاكتىلەرگە سۇيەنەمىز. شەكاراداعى ايەلدەر مەن بالالار قورقىنىشتى ۇناتپايدى»، – دەدى.

ال، دەموكراتتاردىڭ جەتەكشىسى چاك شۋمەر بولسا: «شەكارا قورعانى امەريكانىڭ سيمۆولى ەمەس، كەرىسىنشە «ازاتتىق ءمۇسىنى». كونگرەسس وكىلدەرى شەكارا قاۋىپسىزدىگىن قورعان قۇرىلىسىنان باسقا جولدارمەن شەشۋگە دە بولادى دەپ قارايدى» – دەدى.

اقش تەرريتورياسىنا زاڭسىز قونىس اۋدارۋشىلاردى توقتاتۋ ءۇشىن 3200 شاقىرىمدىق وڭتۇستىك شەكاراعا قورعان تۇرعىزۋ يدەياسىن ترامپ تاققا وتىرعالى بەرى تولاسسىز ايتىپ كەلەدى. ونىڭ بۇل يدەياسى سايلاۋ كەزىندە دە كوپ تالقىعا تۇسكەن ەدى.

 “The Qazaq Times”