وزبەكستان پرەزيدەنتى شاۆكات ميرزيەەۆ. فوتو: ازيا-پليۋس

وزبەكستان پرەزيدەنتى شاۆكات ميرزيەەۆ شەتەلدە جۇرگەن وزبەكستاندىق مامانداردىڭ ءتىزىمىن جاساۋعا تاپسىرما بەردى.

Lex.uz پورتالىندا جاريالانعان جارلىقتا ميرزيەەۆتىڭ ءتيىستى مينيسترلىكتەر مەن ۆەدومستۆالارعا وزبەكستان ءسىم مەن «ەل-يۋرت ۋميدي» قورىنا شەتەلدە جۇرگەن وزبەكستاندىق مامانداردىڭ ءتىزىمىن ازىرلەپ، ۇسىنۋعا تاپسىرما بەرگەن.

بۇدان بولەك جارلىقتا وزبەكستان ماماندارىن شەتەلدەرگە وقۋعا جىبەرۋ، شەتەلدىك ساراپشىلاردى ەلگە تارتۋ، ەكونوميكالىق رەفورمالاردى جۇزەگە اسىرۋ بارىسىندا مامانداردى كونكۋرس بويىنشا قابىلدۋ سياقتى ماسەلەلەر ايتىلعان.

قازىرگى تاڭدا وزبەكستاندا مامان تاپشىلىعى بايقالۋدا. وسى ولقىلىقتىڭ ورنىن تولتىرۋ ءۇشىن ەل بيلىگى 2019-2021 جىلدار ارالىعىندا 4 مىڭ ماماندى حالىقارالىق ۋنيۆەرسيتەتتەردە قايتا وقىتپاق. وقۋ اقىسى «ەل-يۋرت ۋميدي» قورىنىڭ ەسەبىنەن تولەنەدى دەپ جوسپارلانۋدا.

"The Qazaq Times"