اقش پەن وڭتۇستكى كورەيا قانداي جاعداي تۋىلسا دا وداقتاس بولىپ قالۋعا كەلىستى

اقش پەن وڭتۇستىك كورەيا قورعانىس مينيسترلەرى تەلەفون ارقىلى سويلەسىپ، ەكى ەلدىڭ كۇشتى وداقتاستىعىن جالعاستى ساقتاۋعا كەلىسكەن. سويلەسۋدە قورعانىس مينيسترلەر بىرلەسە ارەكەت ەتۋگە دايىن بولىپ، كورەي تۇبەگىندەگى يادرولىق قارۋسىزدانۋ ءىسى مەن بەيبىتشىلىك ورناتۋداعى ديپلوماتيالىق قۇلشىنىسقا قولداۋ كورسەتۋگە كەلىسىم بەرگەن.

وڭتۇستىك كورەيانىڭ قورعانىس مينيسترلىگى بۇگىن تۇسكەن بۇرىن جاريالاعان مالىمدەمەسىندە اتالعان حاباردى راستاپ: «قورعانىس ءمينيسترى جوڭ كيوڭ-دو مەن اقش قورعانىس ءمينيسترىنىڭ قىزمەتىن اتقارۋشى پاتريك شاناحان وڭتۇستىك كورەيا مەن اقش قانداي دا ءبىر وزگەرىس ورىن العان جاعدايدا وداقتاستىق پەن بىرلەسكەن قورعانىس مۇمكىندىكتەرىن ساقتاپ قالۋعا كەلىستى»، – دەپ مالىمدەگەن. سونداي-اق، سويلەسۋ مينيسترلەر ءبىر-بىرىنە جىلى لەبىز تانىتقانىن باسا ايتادى.

پاتريك شاناحان 1 قاڭتاردان باستاپ پەنتاگون تىزگىنىن قولعا الدى.  ول العاش رەت وتكىزگەن جوعارى دەڭگەيدەگى كەزدەسۋدە ۇلتتىق قورعانىس ستراتەگياسىن جۇزەگە اسىرۋدى جالعاستىرۋعا ۋادە بەرگەن. قازىرگى قۇراما شتاتتىڭ ۇلتتىق قورعانىس ستراتەگياسى – رەسەي مەن قىتايدى باستى قارسىلاس رەتىندە قاراستىرۋ; اقش اسكەري قىزمەتكەرلەرىنىڭ ءولىم-ءجىتىمىن ازايتۋ; قاۋىپتەرگە قارسى قورعانىس وداعىن كۇشەيتۋ.

2017 جىلى 1 قاڭتاردا اقش پرەزيدەنتى رەتىندە بيلىك ۇستاعان ترامپ بىرنەشە رەت قورعانىس وداقتاستارىن شىعىنداردى لايىقتى بولىسپەگەنىن سىنعا العان ەدى. بۇل وداقتاستارىنىڭ اراسىندا ناتو مۇشەلەرى مەن ازيا-تىنىق مۇحيت ايماعىنداعى جاپونيا، وڭتۇستىك كورەيا قاتارلى سەرىكتەرى دە بار.

شىن مانىسىندە،  جەيمس مەتتيس ءدال وسى ماسەلەدەگى كوزقاراسى ترامپپەن بىردەي بولماعاندىقتان قىزمەتتەن كەتكەن بولاتىن.  ول ترامپتىڭ بۇل ايىپتاۋلارى اقش پەن ونىڭ وداقتاستارى اراسىنداعى سەنىمگە نۇقسان كەلتىرىپ، ۇلتتىق قورعانىس ستراتەگياسىن جۇزەگە اسىرۋ قابىلەتىن السىرەتەدى دەپ ساناعان. مەتتيس پرەزيدەنتكە ءوز دوعارىسىن (وتستاۆكاسىن) تالاپ ەتكەن حاتىندا دا بۇل ماسەلەنى اشالاپ ايتىپ، كەلەسى پەنتاگون باسشىسىنىڭ بۇل جاعىندا پرەزيدەنتپەن ويى ورتاق ادام بولۋىن ەسكەرتەدى.

“The Qazaq Times”