فوتو: Novoye-Vremya.com

اقش تۇركياعا ءسۇريا ماسەلەسىنە قاتىستى ۋلتيماتۋم قويدى.

اقش پرەزيدەنتىنىڭ ۇلتتىق قاۋىپسىزدىك جونىندەگى كەڭەسشىسى جون بولتون رەسمي انكاراعا ۋلتيماتۋم قويدى.

«ءسۇريادان اسكەري كۇشتەرىمىزدى شىعارۋ ۋاقىتى ءبىز كورگىمىز كەلگەن كەلىسىمدەر ورىندالعان كەزدە بەلگىلى بولادى. كەلىسىم ورىندالعان ساتتە عانا اسكەردى شىعارۋ مەرزىمىن بەلگىلەيمىز» - دەپ مالىمدەدى بولتون.

اق ءۇي تاراپىنىڭ تالابى بويىنشا، تۇركيا اقش ءسۇريا اۋماعىنان اسكەرىن شىعارعاننان كەيىن سۇريالىق كۇردتەرگە شابۋىل جاساماۋعا ۋادە بەرۋى ءتيىس. ويتپەگەن جاعدايدا اقش اسكەرىن ەل اۋماعىنان شىعارۋ مەرزىمى مەن ۋاقىتىن بەلگىلەمەيدى.

ەستەرىڭىزگە سالايىق، جەلتوقسان ايىندا اقش پرەزيدەنتى دونالد ترامپ «ءسۇريا اۋماعىنداعى امەريكا اسكەرىن شىعاراتىنىن» مالىمدەگەن. ونىڭ بۇل قادامىن وداقتاستارى قاتاڭ سىنعا الىپ، «ۇلكەن قاتەلىك» دەگەن باعا بەرگەن. ال رەسمي انكارا ترامپتىڭ بۇل شەشىمىن كەرسىنشە قولداعان.

"The Qazaq Times"