رۋمىنيا ەۋروپالىق وداق كەڭەسىنە توراعالىق ەتەدى

رۋمىنيا ەۋروپالىق وداق كەڭەسىنە توراعالىق ەتەدى.

Reuters اگەنتتىگىنىڭ حابارلاۋىنشا، ەندى رۋمىنيا الداعى 6 ايدا بۋحارەست وداقتىق ءسامميتىن ۇيىمداستىراتىن بولادى. سونداي-اق وزگە دە ماڭىزدى ەكونوميكالىق كەزدەسۋلەردىڭ كۇن ءتارتىبىن ۇيلەستىرەدى.

ەۋروكوميسسيا پرەزيدەنتى جان-كلود يۋنكەر اتالعان لاۋازىمنىڭ مىندەتتەرىمەن تانىستىرا كەلە، رۋمىنيا توراعالىق ەتەتىن جىلدىڭ جالپى وداق ءۇشىن ماڭىزدى داتالارمەن ساي كەلەتىندىگىن ايتىپ ءوتتى. ولاردىڭ قاتارىندا بۋحارەست ءسامميتى جانە شەشىمىن تاپپاعان ماسەلەلەر بار. بۇعان قاتىستى رۋمىنيا پرەمەر-ءمينيسترى ۆيوريكا دەنچيلە 6 اي ىشىندە توراعالىق ەتۋ ارقىلى وداقتاعى ۇيىمشىلدىقتى ارتتىرامىز دەپ ءسوز بەردى. ونىڭ ايتۋىنشا، ۇيىمشىلدىق ەۋرووداقتىڭ باسكەلەستىگىن ارتتىراتىن بىردەن-ءبىر باستى دۇنيە. رۋمىن ۇكىمەتىنىڭ باسشىسى ءوز سوزىندە: «رۋمىنيانىڭ باسشىلىق ەتۋ كەزىندەگى باستى باعىتتارى: ەۋروپانى جاقىنداستىرۋ، قاۋىپسىزدىك، جاھاندانۋ جانە ورتاق قۇندىلىقتاردى دامىتۋ. بۇل مارتەبەلى قىزمەتتى يەلەنە وتىرىپ، كەلەسى ايلاردا كۇن تارتىبىندە تۇرعان ماسەلەلەردى قاراستىرامىز. ال بۇل جولدا قۇرلىقتىڭ بارلىق ەلدەرى مەن ساياسي ينستيتۋتتارى قاتىساتىن بولادى. رۋمىنيا ەۋروپالىق وداق ەلدەرى اراسىنداعى ىنتىماق پەن تەڭدىكتىڭ ساقتالۋىنا ءجىتى كوڭىل بولەتىن بولادى»، – دەدى.

ايتا كەتەر جايت، رۋمىنيا توراعالىعى جوعارىدا اتالعان بۋحارەست سامميتىنەن بولەك ۇلىبريتانيانىڭ Brexit كەلىسىمى، جالپىەۋروپالىق سايلاۋ سىندى كۇردەلى ماسەلەلەرمەن تۇسپا-تۇس كەلىپ وتىر. سول سەبەپتى جاقىن ارادا رۋمىنيا شەنگەن ايماعىنا كىرۋى مۇمكىن. دەمەك، مەملەكەتتىڭ ەۋرووداقتاعى ىقپالى ارتا تۇسپەك.

"The Qazaq Times"