ترامپ: مەكسيكامەن شەكارا ماسەلەسى شەشىلمەيىنشە، اقش ۇكىمەتى جۇمىسىن جالعاستىرمايدى

كونگرەستە دەموكراتتار مەكسيكا شەكاراسىنداعى قابىرعانى قارجىلاندىرۋ تۋرالى كەلىسىمگە قول قويمايىنشا، اقش ۇكىمەتى جۇمىسىن جالعاستىرمايدى. بۇل تۋرالى اقش پرەزيدەنتى دونالد ترامپ حابارلادى.

اق ءۇي باسشىسى مەكسيكامەن اراداعى شەكارانى كۇشەيتۋگە 5,7 ميلليارد دوللارعا جۋىق قارجى بولىنەتىنىن ايتقان. ترامپ شەكاراداعى اسكەري توپتار مەن قورعانداردى كۇشەيتۋ ارقىلى ورتالىق جانە لاتىن امەريكاسىنان كەلەتىن زاڭسىز ميگرانتتارعا توسقاۋىل بولماق. بىراق، كونگرەستەگى دەموكراتتار پرەزيدەنتتىڭ شەشىمىن ماقۇلداعان جوق. ەندى شەكارا قابىرعاسىنا قاتىستى داۋ تۋىنداپ، رەسپۋبليكالىقتار مەن دەموكراتتار ءبىر شەشىمگە كەلە الماي دال. وسىدان كەيىن وتكەن اپتادا بيۋدجەتتىك داعدارىسقا بايلانىستى ەلدەگى 15 مينيسترلىكتىڭ توعىزى جۇمىسىن توقتاتقان. وسى اپتادا اق ۇيدە ارنايى جيىن ءوتىپ، شەكارا ماسەلەسىن جوعارى پالاتادا تالقىلاۋ تۋرالى كەلىسىمگە كەلدى. قوس تاراپ ورتاق شەشىمگە كەلسە، اقش ۇكىمەتىنىڭ جۇمىسى قايتا قالپىنا كەلتىرىلەدى.

بۇل ماسەلەگە قاتىستى دونالد ترامپتىڭ ءوزى: «ۇكىمەتتىڭ تولىعىمەن قاشان جۇمىسقا كىرىسەتىندىگىن ايتا المايمىن. شەكارادا قاقپا تۇرعىزىلمايىنشا «شاتداۋن» جالعاسا بەرەدى. بۇل قابىرعا ەلگە زاڭسىز كىرگىسى كەلەتىندەرگە توسقاۋىل بولادى. جاھاندىق كەسەلگە اينالعان ادام ساۋداسى مەن ەسىرتكى تاسىمالىنا نۇكتە قويادى. قازىرگى ۋاقىتتا ءبىز ادام ساۋدالاۋشىلاردى قولعا ءتۇسىرۋ ءۇشىن جۇمىس ىستەپ جاتىرمىز. ال مەكسيكامەن اراداعى شەكاراعا قاقپا سالىنبايىنشا، وسى اتالعان كەسەلدەرمەن كۇرەسۋ قيىنعا سوعادى»،– دەپ مالىمدەدى.

ەسكە سالا كەتەيىك، ەكى اي بۇرىن گوندۋراستان بەت العان التى مىڭعا جۋىق بوسقىن مەكسيكا شەكاراسىنا جەتىپ، ارى اسپاق بولعان. قازىرشە مەكسيكا بيلىگى سيۋداد-يدالگو قالاسىنداعى ميگرانتتاردى ورنالاستىرۋ ورتالىعىنا 5000-نان استام ادامدى تىركەدى. 24 جەلتوقساندا دونالد ترامپ رەسمي مالىمدەمە جاساپ، مەكسيكامەن شەكارا قابىرعاسىنا قارجى بولىنبەيىنشە، اقش ۇكىمەتى جۇمىسىن قىسقارتادى دەگەن.

"The Qazaq Times"