كابۋلداعى تەررورلىق شابۋىل. فوتو; انادولى.

اۋعانستاننىڭ استاناسى كابۋل قالاسىندا ۇكىمەت عيماراتىنا جاسالعان تەررورلىق شابۋىلدان 29 ادام قازا تاۋىپ، 23 ادام جاراقات الدى.

اۋعانستان ىشكى ىستەر مينيسترلىگى تاراتقان مالىمەتكە قاراعاندا، تەررورلىق شابۋىل جارىلعىش تيەلگەن كولىك ارقىلى جاسالعان. جارىلىستان كەيىن قارۋلى سودىرلار عيماراتقا باسىپ كىرگەن. قاۋىپسىزدىك قىزمەتكەرلەرى ءۇش سودىردى ولتىرگەن جانە عيماراتتاعى 357 ادامدى قاۋىپسىز جەرگە جەتكىزگەن.

اقپارات كوزدەرىنىڭ مالىمدەۋىنشە، ۇكىمەت عيماراتىنىڭ ىشىندە دە تەررورلىق توپتىڭ جاقتاستارى بولعان. قاۋىپسىزدىك كۇشتەرى مەن قارۋلى سودىرلار اراسىندا اتىس كەزىندە عيمارات ىشىندە ءورت شىققان. ونىمەن قوسا سودىرلار عيمارات ىشىندە تاعى بىرنەشە رەت جارىلىس جاساعان.

سوڭعى كەزدەرى، اۋعانستان ۇكىمەتىندە جانە ۇكىمەتكە قاراستى قارۋلى كۇشتەردىڭ اراسىندا تاليبان ۇيىمىنىڭ جاقتاستارى بار ەكەنى بەلگىلى بولۋدا. ۇكىمەت كۇشتەرىنىڭ اراسىنداعى تەررورلىق ۇيىمنىڭ جاقتاستارى جاعىنان جاسالعان شابۋىلداردان جۇزگە تارتا ادام قازا بولعان.

“The Qazaq Times”