اشراف عاني اۋعانستانداعى كەلەسى پرەزيدەنتتىك سايلاۋعا ءوز كانديداتۋراسىن ۇسىندى

اۋعانستاندا 2019 جىلعا جوسپارلانعان پرەزيدەنتتىك سايلاۋعا كانديداتتاردى تىركەۋ باستالدى. بۇل تۋرالى Khaama Press مالىمدەپ وتىر.

اۋعانستان سايلاۋ كوميسسياسىنىڭ سوزىنشە، قازىرگى تاڭدا پرەزيدەنتتىك سايلاۋ 20 ساۋىرگە بەلگىلەنگەن. الايدا، ءدال وسى كۇنى گازني قالاسىندا كەيىنگە شەگەرىلگەن پارلامەنت سايلاۋى دا جوسپارلانعان ەكەن.

قازىرگى تاڭدا ون بەستەن استام كانديدات پرەزيدەنتتىك سايلاۋعا قاتىسۋ ءۇشىن تىركەۋگە تۇرعان. اۋعانستان زاڭى بويىنشا، اتالعان لاۋازىمعا اۋعان ازاماتتىعى بار، اتا-اناسى اۋعاندىق، مۇسىلمان جانە سوتتالماعان ازاماتتاردىڭ بارلىعىنا قاتىسۋعا بولادى.

اۋعانستان سايلاۋ كوميسسياسىنا بارىپ تىركەۋگە تۇرعانداردىڭ اراسىندا ۇكىمەت ءمينيسترى ابدۋللا ابدۋللا، «ماسۋد» قورىنىڭ جەتەكشىسى احمەت ۆالي ماسۋد جانە اۋعانستاننىڭ قازىرگى پرەزيدەنتى اشراف عاني كەلەسى سايلاۋعا ءوز ۇمىتكەرلىگىن ۇسىنعان.

بۇدان ءسال ەرتەرەكتە ەلدىڭ قاۋىپسىزدىگى مەن وزگە دە جاعدايلارعا بايلانىستى اۋعانستاندا پرەزيدەنت سايلاۋى كەيىنگە شەگەرىلەدى دەگەن اقپارات شىققان. الايدا، جوسپارلانعان داتا سول كۇيى قابىلداندى.

قازان ايىندا وتكەن اۋعانستانداعى پارلامەنت سايلاۋى كەزىندە، تاليبان ۇيىمى مەن يسلام مەملەكەتى تەررورلىق ارەكەتتەرگە بارىپ، داۋىس بەرۋ ورىندارىندا جارىلىس جاساعان. سونىڭ سالدارىنان 56 ادام قازا تاۋىپ، 379 ادام ءتۇرلى دەنە جاراقاتىن الدى. اتالعان وقيعانى باقىلاۋىندا ۇستاعان بۇۇ، اۋعانستانداعى پارلامەنت سايلاۋى زاماناۋي تاريحتاعى ەڭ قاندى سايلاۋ دەپ مالىمدەگەن بولاتىن. بۇدان بولەك اۋعانستاننىڭ تاليبان ۇيىمى شوعىرلانعان شاعىن اۋداندارىنىڭ تۇرعىندارى داۋىس بەرۋ شاراسىنا دا قاتىسا المادى.

اۋعانستانداعى پرەزيدەنتتىك سايلاۋ كەلەسى جىلى قانداي بولاتىنى بەلگىسىز. سەبەبى اقش، اۋعان شەكاراسىنداعى اسكەرىنىڭ باسىم بولىگىن امەريكاعا قايتارادىندىعى تۋرالى مالىمدەگەن بولاتىن. وسىدان كەيىن، تاليبانداردىڭ ارەكەتى مەن كانديداتتاردىڭ اراسىنداعى ارازدىڭ دا كۇشەيەتىنى بەلگىلى. ۇزاق جىلدار بويى قاقتىعىستان كوز اشپاي كەلە جاتقان اۋعانستان ەلى، كەلەر جىلى ءادىل سايلاۋ وتكىزەدى دەگەنگە، كوپتەگەن حالىقارالىق ساراپشىلار باس شايقاپ وتىر.

“The Qazaq Times”